Mes rezultateve të ndeshjeve përgatitore të luajtura ditën e djeshme, spikat fitorja e thellë e Spanjës ndaj Koresë së Jugut.
Spanjollët kanë fituar 6-1, duke dhënë sinjale se në Europian nuk do të jenë ata të dy viteve të shkuara, kur bënë një paraqitje të shëmtuar në Brazil.
Morata e Nolito shënuan nga dy gola, e po ashtu Fabregas dhe David Silva e gjetën nga një herë rrjetën.
Rusia humbi 1-2 me Çekinë. Kokorin i kaloi fillimisht rusët në epërsi, por dy golat e realizuar nga Rosicky dhe Necid u dhanë fitoren çekëve.
Humbje ka pësuar dje dhe Islanda, një tjetër skuadër debutuese në Euro 2016. Islandezët kanë humbur 2-3 në përballjen me Norvegjinë.
Polonia gjithashtu ka pësuar një humbje në Gdansk. Ndaj Holandës, të munguarës së madhe në këtë Europian, polakët janë dorëzuar me një humbje 1-2.
I vetmi barazim ka qenë në takimin mes Belgjikës dhe Finlandës. Sfida po shkonte drejt një fitoreje të miqve, që kryesonin që nga minuta e 53-të, pas golit të shënuar nga Hamalainen. Lukaku i shpëton belgët vetëm një minutë para mbylljes së lojës, duke shënuar dhe duke i fiksuar shifrat në 1-1. /tesheshi.com/
