Tensioni mbetet ende i pranishëm në Turqi pak ditë pas shpërthimit në Suruç, që u mori jetën së paku 31 personave e la mbi 100 të plagosur.
Në Dijarbakër, në juglindje të vendit, dy punonjës policie të trafikut rrugor u sulmuan me armë zjarri. Nga plagët e marra vdiq njëri prej tyre, e tjetri është i plagosur e gjendet në trajtim mjekësor. Raportimet e para bëjnë të ditur se sulmi është organizuar nga pjesëtarë të PKK-së, organizatës terroriste kurde.
Më pas në Kilis, në provincën jugore të Turqisë, militantë të ISIS-it qëlluan nga ana siriane e kufirit, duke vrarë një oficer dhe duke plagosur pesë ushtarë. Forcat turke iu përgjigjën zjarrit, duke goditur pozicionet matanë kufirit. Mendohet se nga zjarri ka mbetur i vrarë një militant i ISIS-it.
Një ditë më parë humbën jetën dy punonjës të tjerë policie, të vrarë në Xhejlanpënar nga anëtarët e PKK-së.
Zëvendëskryeministri turk, Bylent Arënç, njoftoi si hap të parë, në përpjekje për t’u dalë përpara situatave të tjera të pakëndshme, përgatitjen e një sistemi të sigurisë fizike në kufi me Sirinë. Vendosja e këtij sistemi nga Forcat e Armatosura Turke do të pengojë kalimin e terroristëve, çfarëdo qofshin ata, të ISIS-it, të PYD-së, apo të organizatave të ngjashme terroriste.
Gjendjes në prag lufte në tërë hapësirën në kufi me Sirinë i shtohet dhe paqartësia politike në vend. Kryeministri në detyrë, i ngarkuar të krijojë qeverinë e re, është tashmë vetëm përpara një mundësie të vetme, asaj të koalicionit me partinë kryesore opozitare, CHP-në, pasi partitë e tjera e kanë refuzuar ftesën. Republikanët janë të vetmit që kanë shprehur gatishmërinë për të qeverisur me AKP-në, por nuk u kanë mbyllur dyert dhe zgjedhjeve të reja. Dëshirën për të shkuar në zgjedhje të reja e kanë shprehur dhe nacionalistët e MHP-së, që po bëhen gati për një fushatë të re zgjedhore. /tesheshi.com/
