Ndërsa ditën e djeshme dha dorëheqjen për shkak të një dënimi në mungesë, sot vijojnë akuzat në distancë mes kryebashkiakut të dorëhequr të Kavajës, Elvis Roshi dhe kreut të PD-së, Lulzim Basha.
Ka qenë Basha ai që ka akuzuar Ramën se mbron Roshin duke “poshtëruar miliona emigrantë”.
“Tutori i Elvis Roshit është Edi Rama, i cili poshtëroi miliona emigrantë shqiptarë duke u thënë që të gjithë jeni si Elvisi. Nuk besoj se emigrantët tanë kanë marrë pjesë në përdhunime në grup apo trafik droge. Largimi i Rroshit është i pamjaftueshëm sa kohë që arkitekti i kriminalizimit të politikës e justifikon krimin”, – tha Basha.
I menjëhershëm ka qenë edhe reagimi i Elvis Roshit, i cili thotë se është dënuar si minoren në mungesë për diçka që nuk e ka bërë dhe s’ka bërë asnjë ditë burg. Roshi shton se nuk ka vrarë njerëz në bulevard, nuk ka grabitur paratë e buxhetit të shtetit, nuk i ka ikur gjyqit me raporte mjekësore fallco si Lulja e Shqupit
“Unë nuk do t’i ndahem kësaj beteje dhe do ta fitoj pafajësinë në Itali. Sepse sot s’jam më një kalama në mëshirën e fatit dhe kam me vete të vërtetën dhe popullin e Kavajës që ma bën zemrën mal me mbështetjen në këto orë të vështira. I jap fjalën Lules dhe Saliut se në Kavajë s’kanë për t’u kthyer kurrë fitimtarë dhe kanë për ta marrë vesh mirë në zgjedhjet e parakohshme se nga Kavaja nuk i ka përzëne krimi, po populli”, – shkruan ndër të tjera Elvis Roshi në Facebook. /tesheshi.com/
