Në sheshin e Grazhdit në Bethlehem, skena gjigande e lindjes së Krishtit, dhuruar nga Malta, qëndron krenare nën një sërë dritash festive të vendosura në të gjithë sheshin. Këtyre ditëve, kur qyteti duhej të ishte plot, biznesi është i vakët.
Megjithatë, në vigjilje të Krishtlindjeve, sheshi dhe pjesa e Kishës së lashtë të Lindjes së Krishtit, do të ndriçohen nga dritat e televizioneve për të lejuar imazhet e Krishtlindjeve të Betlehemit të transmetohen në gjithë botën. Por, thonë banorët palestinezë të qytetit të Bregut Perëndimor – përfshirë edhe minoritetin e krishterë – do të jenë festime të trishtuara.
Arsyeja është e qartë nga dy banera të mëdhenj që bashkia e qytetit planifikon të shfaqë në shesh për festimet e mbrëmjes së sotme. Në një reagim të drejtpëdrejtë ndaj presidentit amerikan, Donald Trump, që në fillim të muajit shkatërroi dekada të konsensusit ndërkombëtar duke e njohur Jeruzalemin fqinj si kryeqytet të Izraelit, banerat do të shpallin që Jeruzalemi “mbetet gjithnjë kryeqyteti i përjetshëm i Palestinës”.
Me shtimin e protestave dhe përleshjeve, numri i turistëve për festimet ka rënë ndjeshëm, duke sjellë edhe rënie të biznesit në zonë. Festimet do të bëhen, por atmosfera mbetet e tensionuar.
“Turistët izraelitë dhe ata me origjinë palestineze kanë anuluar gjithçka, e të njëjtën gjë po bëjnë edhe të huajt”, thotë Fadi Kattan, pronar i një bujtine dhe një restoranti në zemër të Betlehemit.
Sezoni turistik në fillim premtonte për mirë, por pas njoftimit të Trumpit gjërat ndryshuan.
Kjo është periudha më e rëndësishme e vitit për këtë qytet, ku ritet e Krishtlindjes mbahen në 3 data të ndryshme: më 25 dhjetor, siç e kërkon tradita romano-katolike e ajo protestante; më 6 janar, kur kremtojnë të krishterët ortodoksë; si dhe më 19 janar, dita e festimeve të komunitetit ortodoks armen. /tesheshi.com/
