Policia vietnameze ka zbuluar rreth 2000 mace të ngordhura të destinuara për përdorim në mjekësinë tradicionale, njoftuan sot media shtetërore.
Trupat e maceve u zbuluan dje, të enjten, në një thertore në provincën Dong Thap, në deltën e Mekong (Vietnamit jugor), së bashku me 480 mace të tjera të gjalla, sipas gazetës zyrtare të provincës.
Me një peshë totale prej katër tonësh, trupat ishin vendosur në një dhomë të ftohtë përpara se të shndërroheshin në produkte të mjekësisë tradicionale pas një procesi të gjatë zierjeje, sipas gazetës.
Disa vietnamezë besojnë se lëngu i kockave të maces ndihmon në trajtimin e sëmundjeve të tilla si astma dhe osteoporoza.
Kufomat e maceve u asgjësuan, ndërsa macet e shpëtuara do t’i nënshtrohen kontrolleve shëndetësore.
Ushqimi i qenve dhe maceve është ende i ligjshëm në Vietnam, dhe restorante të shumta në vend ofrojnë mish nga këto kafshë, por ata që merren me tregti duhet të kenë certifikata që vërtetojnë origjinën e kafshëve.
Thertorja Dong Thap nuk kishte dokumente për të lejuar therjen e kafshëve dhe për të treguar origjinën e tyre.
Deri më tani për këtë rast nuk është bërë asnjë arrestim.
Sipas organizatës joqeveritare Four Pows International, deri në një milion mace bien viktima të kësaj tregtie në Vietnam çdo vit. /tesheshi.com/
