Nga Blendi Gashi
Zbulimi i xhirimeve nga qendra e paraburgimit në Prizren, e që kanë të bëjnë me rastin e vdekjes së Astrit Deharit, incizime të publikuara ditë më parë nga mediat kosovare, konkretisht nga televizioni “Klan Kosova”, por jo vetëm, kanë ngjallur reagime të shumta në opinionin publik kosovar.
Ndërsa, njohës të fushës së gazetarisë vlerësuan se mediat nuk gabuan me publikimin e videove, institucioni i Avokatit të Popullit, vlerëson se publikimi i videove në fjalë paraqet shkelje sipas Kodit Penal të Republikës së Kosovës, por gjithashtu shkelje të rënda të etikës profesionale.
Kodi i Procedurës Penale në këtë fazë të procedurës penale ndalon qasjen e dokumenteve, dëshmive apo çfarëdo informacioni që ndërlidhet me zbardhjen e këtij rasti, nga persona të paautorizuar, përfshirë publikimin e tij.
Megjithatë, mediet në raste të tilla sipas ligjit të aplikueshëm në Kosovë, nuk kanë përgjegjësi penale, respektivisht edhe nuk mund të iniciohet ndjekje penale ndaj tyre.
Publikimi i xhirimeve nga mediat ka bërë që të reagoj ashpër edhe familja Dehari, si dhe avokati i tyre Tomë Gashi.
Ky i fundit xhirimet që rrjedhën në media i ka cilësuar të manipuluara duke thënë se po tentohet të vërtetohet diçka para se të dalin rezultatet përfundimtare për vdekjen e Astrit.
Avokati i familjes Dehari direkt fajin për publikimin e incizimeve ia ka mveshur shtetit, për çka ka ngritur padi, dhe tashmë Prokuroria e Shtetit veç kanë nisur hetimet ndaj personave që u kanë dhënë videoincizimet mediave.
Ndërsa, reagime të ndryshme për zbulimin e incizimeve erdhën edhe nga analistë dhe njohës të shoqërisë civile, është e çudtishme se për çështjen e lartcekur asnjë fjalë nuk e thanë drejtuesit e shtetit.
Po, në ditën (11 nëntor) që Avni e Xhemile Dehari, prindërit e Astritit u paraqitën në një konferencë për media ku shprehën indinjatën me publikimin e atyre incizimeve, konferencë mbajti edhe ministrja e Drejtësisë Dhurata Hoxha.
Kjo e fundit, në konferencë përsëriti fjalët të cilat veç i kishte thënë në konferencën që mbajti me kryeprokurorin e Shtetit pas vdekjes së Astrit, se rasti do të hetohet dhe se për një gjë të tillë janë vënë në lëvizje të gjitha mekanizmat.
Shtrohet pyetja a ka qenë e nevojshme ministrja Hoxha të thërras konferencë për të thënë fjalët e njëjta, apo është “urdhëruar” të dalë para mediave kinse shteti po punon për rastin në fjalë?
Është e çudtishme se si ministrja Hoxha e vetëdijshme për publikimin e videove, nuk e tha asnjë fjalë për incizimet. Pra ajo në vend që të jep detaje për këtë çështje, vendosi të hesht.
Për më keq ministrja Hoxha nuk pranoi as pyetje nga gazetarët, duke treguar se po ndjek një shembull jo të mirë që jo pak koleg të saj e bëjnë.
Andaj, e pashmangshme është pyetja, pse ministrja e Drejtësisë nuk qe e gatshme të përgjigjet në secilën pyetje që do kishin shtruar gazetarët, qoftë edhe ajo për daljen e incizimeve?
Ajo është dashur padyshim të deklarohet për daljen e incizimeve nga burgu i Prizrenit, të jep versionin e minsitrisë që drejton dhe njëherit të kërkoi përgjegjësi.
Por jo, vendosi të hesht. Ky mosguxim vë shumë pikëpyetje që në të njëjtën kohë ngrit dilema të ndryshme qoftë për publikimine videove, e sidomos për mos zbulimin e rastit për vdekjen tragjike të një 26-vjeçari që ishte në përkujdesje të shtetit, edhe pse u premtua se një gjë e tillë do ndodhte shpejt.
Gjatë kësaj konference për shtyp, ministrja e Drejtësisë kërkoi që të gjithë të “besojnë në drejtësi”, duke thënë se “e vetmja rrugë drejt zbardhjes së këtij rasti është rruga institucionale dhe çdo tendencë për të anashkaluar institucionet është në dëm të vet procesit dhe sundimit të ligjit në Kosovë”.
Nëse me shprehjen të “besojmë në drejtësi”, ka menduar se drejtësia kosovare do zbardh rastin në fjalë, atëherë përgjigjen e ka marrë qysh të premtën, po nga familja Dehari që ka thënë se nuk beson fare në institucinet e shtetit të Kosovës, për çka dhe kanë drejtuar gishtin për vdekjen e djalit të tyre.
Për daljen e incizimeve nuk po hesht veç Hoxha. Një gjë të tillë po e bën edhe shefi i qeverisë Isa Mustafa, i cili nuk e ka thënë asnjë fjalë që nga data 7 nëntor, dy ditë pas vdekjes së Astritit, kur kërkoi nga institucionet t’i ndërmarrin të gjitha veprimet e pavarura që të bëhet konstatimi i vdekjes në mënyrë të pavarur dhe të gjeturat të jenë transparente për publikun.
Mbetet të shihet në ditët në vijim nëse krerët e shtetit do të deklarohen për rrjedhjen e incizimeve nga qendra e paraburgimit në Prizren, dhe nëse personat gjegjës do të përballen me drejtësinë.
Ndryshe, Astrit Dehari, u gjet i vdekur në rrethana të dyshimta, mbrëmjen e 5 nëntorit.
Raportet e para të autopsisë kanë konstatuar se Dehari vdiq si pasojë e asfiksisë, gjegjësisht probleme me frymëmarrje, por që ende nuk ka dalë raporti zyrtar i mjekësisë ligjore. /tesheshi.com/
