Refugjatët në Gjermani po u ofrojnë lule grave vendase, në një përpjekje për të sfiduar perceptimet negative që janë rritur pas valës së sulmeve seksuale mbi gratë në disa qytete gjermane në vigjiljen e vitit të ri.
Një grup refugjatësh meshkuj vendosën të ofrojnë tulipanë për gratë gjermane për të treguar se ata ndajnë të njëjtin zemërim që ka përfshirë kombin, pas sulmeve. Ata duan të thonë gjithashtu me një gjest të tillë, se shprehin respekt për të drejtat e grave dhe mirënjohjen e tyre ndaj vendit që u ka dhënë strehim.
Nisma është filmuar nga Berliner Morgenpost. Video e filmuar përpara një stacioni treni në Berlin, u postua në faqen e Facebook-ut të gazetës duke marrë menjëherë më shumë se 2 milion klikime dhe me mijëra pëlqime.
Demonstrimi me lule synonte të kundërpërballë ndjenjat anti refugjatëve pas sulmeve të vitit të ri. Pas sulmeve seksuale në Këln më shumë se 500 ankesa penale janë depozituar nga gratë dhe 45 për qind e tyre janë për ngacmime seksuale.
Qeveria e kancelares gjermane, Angela Merkel, politika e së cilës për të pranuar një numër të lartë refugjatësh ka nxitur protesta të grupeve kundërshtare të emigracionit, njoftoi pas sulmeve të Këlnit se do të përshpejtojë deportimin e refugjatëve që kryejnë krime.
Në videon e stacionit të Berlinit, refugjatët shihen sesi mbajnë edhe parrulla ku e distancojnë veten nga agresorët. “Pakica nuk përfaqëson të gjithë komunitetin”, lexohet në njërën prej tyre.
Burrat shihen sesi individualisht u qasen grave për t’u dhënë atyre tulipanë. Një nga gratë shihet sesi ndryshon shprehjen e fytyrës nga hutimi në një buzëqeshje kur refugjati i thotë “Faleminderit Gjermani!”.
Në video tregohet edhe sesi një grua gjermane përqafon njërin prej refugjatëve dhe e puth ne faqe. Më pas, pjesëmarrësit dënojnë sulmet. “Ne, si refugjatë nuk i pranojmë akte të tilla”, thotë njëri prej tyre në anglisht.
Videoja përfundon me njërin prej refugjatëve duke thënë se ajo që ndodhi në Këln është kriminale dhe një akt barbar dhe se nuk lidhet me asnjë besim fetar”.
Kjo video pason protestat e dhunshme të Pegidës, grupit të së djathtës ekstreme që është kundër asaj që ata thonë se është “islamizim i Europës”.
Në reagimet në Facebook, ka komente të ndryshme. Dikush thotë se është më i shqetësuar nga dhuna e shkaktuar prej grupeve radikale gjermane, sesa nga refugjatët.
Komente të tjera shfaqin një qasje më të rezervuar, mirëpo shumica e komenteve janë në mbështetje të refugjatëve. Një prej komentuesve e cilëson ofrimin e luleve një akt të sinqertë. Por nuk mungojnë edhe ata që thonë se video është manipulative.
Përgatiti: Juli Prifti – /tesheshi.com/
