Arturo Vidal duket se e ka mbyllur me Bajernin e Mynihut dhe do të largohet që në merkaton e dimrit. Kileni nuk është më i kënaqur në Mynih dhe e ka kërkuar vetë transferimin.
Por mes skuadrave që e mirëpresin mesfushorin, ai ka preferuar të shkojë tek Çelsi i Antonio Kontes, i cili e ka dëshiruar gjithnjë një mesfushor “të keq” e të talentuar si Vidal.
Për Interin, Mancester Junajtid e Valencian, nuk shihet të ketë më shpresa për të patur në përbërje 30 vjeçarin, për të cilin klubi gjerman dhe ai britanik po negociojnë për shifrat.
Deri tani, çmimi i përfolur është ai i 40 milion eurove, por gjithçka është në negociatë e sipër, e shifra e saktë, do të mësohet gjatë ditëve apo muajve në vijim.
Nga ana tjetër, në Gjermani bëjnë pak habi me këtë vendim të klubit, pasi Vidal u konsiderua si blerje e mirë e Bajernit. Me sa duket, ose bavarezët do t’i japin më shumë besim, mesfushorëve Rudi e Martinez, ose po zbrazin formacionin, për të blerë lojtarë të tjerë cilësorë. /tesheshi.com/
