Përveç takimit direkt që do të kenë në zyrën e Lulzim Bashës në selinë blu, zyrtarja e lartë e DASH që ka miqësi të hershme me kreun e opozitës, pritet të sjellë një mesazh shumë të rëndësishëm nga “një mik i përbashët” që mban një post të lartë në Uashington.
Siç mësohet, një zarf i mbyllur do t’i dorëzohet kreut të PD-së të cilin do të duhet ta hapë pas largimit të Nuland në ambasadën amerikane, ku do të zhvillojë një takim joformal me një grup gazetarësh dhe analistësh.
Nënsekretarja amerikane e Shtetit për Evropën dhe Euroazinë, Victoria Nuland, pasditen e së dielës kur të vizitojë Tiranën, mësohet se do t’i propozojë Lulzim Bashës një variant mbi reformën në drejtësi që mund ta bëjë Partinë Demokratike që të rikthehet në tryezën e bisedimeve.
Siç mësohet, zyrtarja e lartë e DASH e cila ka një miqësi të vjetër me kreun e opozitës shqiptare, që kur ky i fundit ishte ministër i jashtëm dhe Nuland ambasadore e SHBA-së në NATO, do të diskutojë një variant që mund t’i japë PD-së një fitore politike pas reformës.
Nuk përjashtohet në këtë rast edhe mundësia e një qeverie teknike ose ekspertësh e cila do të zbatojë reformën në drejtësi deri në zgjedhjet e rregullta të qershorit 2017.
Burimi diplomatik theksoi se bëhet fjalë për një vendim shumë të rëndësishëm që pritet të ketë pasoja të forta mbi politikën shqiptare.
E gjitha kjo manovër bëhet për të forcuar politikën bipolare dhe për të mos faktorizuar më shumë se ç’duhet LSI-në e cila sot është vendimtare me 20 votat e saj për të miratuar reformën në drejtësi.
Axhenda
Nënsekretarja amerikane e Shtetit për Evropën dhe Euroazinë, Victoria Nuland do të vizitojë Kosovën, Shqipërinë, Maqedoninë dhe Serbinë për të diskutuar për bashkëpunimin dypalësh dhe atë rajonal, si edhe për çështje me rëndësi për këto vende.
Më 10 korrik ajo shkon në Prishtinë, ku do të takohet me zyrtarë të lartë qeveritarë dhe përfaqësues të shoqërisë civile, ku do të flitet për ecurinë e zbatimit të dialogut Serbi-Kosovë, mbështetje për vazhdimësinë e integrimit Euro-Atlantik dhe përpjekjet kundër korrupsionit.
Po atë ditë, zonja Nuland mbërrin në Tiranë, ku do të takohet me zyrtarë të lartë qeveritarë, udhëheqës politikë dhe përfaqësues së shoqërisë civile lidhur me çështjet e bashkëpunimit dypalësh dhe rajonal, përfshirë reformën në drejtësi.
Më 11 korrik, ajo shkon në Maqedoni ku do të diskutojë për nevojën e zgjidhjes së krizës politike, do të shprehë mbështetjen për zyrën e Prokurorit të Posaçëm dhe për krijmin e kushteve për zgjedhje të besueshme.
Në Beograd, ajo do të diskutojë për dialogun me Kosovën dhe do të shprehë mbështetjen për përpjekjet e hyrjes në Bashkimin Evropian.
Më 12 korrik, zonja Nuland shkon në Qipro. Para vizitave në vendet ballkanike, zonja Nuland po shoqëron Sekretarin e Shtetit John Kerry, ndërsa ai udhëton në Gjeorgji, Ukrainë dhe Poloni. /tesheshi.com/
