Duket se as metodologjia e re e zgjerimit, të cilën e kërkoi Franca pas vetos së saj për negociatat, nuk do e bëjë të lehtë hapjen e tyre muajt në vijim.
TCH citon ministren franceze të Integrimit, Amélie de Montchalin, të ketë thënë se “vota franceze nuk do të varet vetëm nga metodologjia e re dhe nuk kemi ndërmend një miratim automatik të çeljes së negociatave me Maqedoninë e Veriut dhe Shqipërinë”.
Ajo tha se do presin për të parë përparimin e reformave për të dy shtetet, raporton TCH:
“Në bazë të progres raportit të ri të vlerësimit të situatës që Komisioni do të publikojë në muajin mars, ne duhet të shohim nëse kushtet janë përmbushur dhe nëse keto dy shtete kanë bërë përparim të mjaftueshëm në reforma për të filluar bisedimet”, ka thënë zyrtarja e lartë e Parisit.
Nga ana tjetër, Rama nga Uashingtoni ka folur për hipokrizi franceze.
“Nuk është se po pretendojmë një dhuratë, por një udhërrëfyes të mirë të konsoliduar. Reforma në drejtësi që po kryejmë është reale dhe është e mundur vetëm për shkak të mbështetjes së SHBA dhe njohurive të BE-së. Për francezët kam thënë, nuk ka të bëjë me ne, por me ata, me vendimin e tyre se cfarë duan për veten e tyre dhe zgjerimin. Kanë një nivel të caktuar hipokrizie, pasi do të kishte qenë më e ndershme që të thonin, që ju i keni bërë detyrat, por ne nuk jemi gati të flasim tani, se duhet të zgjidhim ca probleme.
Kam thënë mjaftueshëm dhe jam zhgënyjer mjaftueshëm, pasi me këta të gjithë nuk i dihet se janë 27 krerë shtetesh, që kanë 27 zgjidhje të ndryshme”, tha Rama teksa komentoi metodologjinë e re. /tesheshi.com/
