Nga Ylli Pata
Kanë kaluar 24 orë që kur ka hyrë në fuqi çmimi i rritur i biletës së urbanit në Tiranë, dhe njerëzit ende nuk janë mësuar me regjimin e ri.
Robeni, një djal i ri që po kthehet nga shkolla dhe ka marrë linjën e Unazës për të shkuar në shtëpi, është shpuzë: “Na 30 lek, shpërndani abonetë e studentit, ndryshe s’jap asnjë qindarkë”.
Si me shaka i them se po zbaton direktivën e dhënë nga PD-ja për të mos paguar biletën e re, dhe ai ma kthen gjithë nerva: “Ça osht kjo direktiva, kanë thonë që s’do pagujm? Po ti thuj o burr” dhe bërtet: “O fatorine e paske ngju direktivën, nuk do pagujm. Po thashë un osht pisllik ky muhabet”, dhe fët e fët nxjerr smartpohe-n nga xhepi dhe nis të luajë duart shpejt.
“Po çon ndonjë mesazh në Facebook”, i them unë, por ai ma pret shkurt: “FB-ja të humb kohë, jam në Instagram”.
Rasimi, është një invalid i shkallës së parë. Një dorë e ka të paralizuar. Fatorinoja i bërtet: “biletën shpejt”: ai ia kthen se ka librezë. “Nuk njihen!”, ja kthen fatorinoja me zë të trashur.
Rasimi ia kthen se nuk paguan. Pas tij flasin në kor disa vetë, gra e burra. “Po shyqyr që folët o njerëz, pse nuk shkoni te Erjon Veliaj, zijani zyrën”, flet një burrë në mes-moshë që në dorë ka të rrudhur një gazetë “Çelësi”.
Fatorinoja nuk mban më po shfryn: “Po ça bohet kshu do të më hiqni nga puna, nuk kam shit asnjë biletë”! Gati sa s’i dalin lotët.
Një grua në moshë i rrah krahët dhe i thotë: “Po duan lekë këto pronarët tuaj, kam hipur te Zogu Zi, ka një orë dhe ende nuk kam mbërritur te Brryli, pse kshu punoni ju”.
Autobusi mbërriti te Farmacia 10. Dy burra me radio në dorë që kutërbonin era alkool u futën tërë vrull. Njëri prej tyre, sa foli me fatorinon, e kapi për jeleku, ia hoqi nga trupi dhe i bërtiti sa kishte në kokë: “Ik n’shpi o legen, kam faj un që të mora, je i pushuar”!
Fatorino nuk foli, po iu afrua derës së dytë, zbriti dhe ia mbathi me të katërta. Njeriu që kutërbonte alkool u kujtua: “ueeee, i mori leket me vete”, u kthye nga erdhi dhe shkeli të katërtin duke ndjekur fatorinon e pushuar…. /tesheshi.com/
