Ecja ditën apo natën në rrugët e Tiranës është kthyer në një makth më vete. E jo vetëm prej makinave që garojnë pa njohur caqe, po dhe prej qenve. Nuk mjafton moda e re e shqiptarëve, që gjithnjë e më tepër po i bëjnë pjesë të tyre qentë, të cilët shpesh sillen rrotull nesh pa asnjë mjet mbrojtës, a thua se janë dele, e jo se kanë goxha dhëmbë që mund të shqyejnë nga çasti në çast, por janë dhe qentë e rrugëve, të shtuar frikshëm kohët e fundit.
Qindra iniciativa të “guximshme” ka marrë qeveria, por nuk është kujtuar t’i detyrojë të zotët e qenve që t’u vënë fre kafshëve të tyre. Në këtë rast, gjoba e majme do të ishte vërtet justifikim për ata që nuk ngurrojnë që kënaqësinë e tyre të mbajtjes së qenve ta kthejnë në fatkeqësi për njerëzit të cilët nuk e duan praninë e këtyre kafshëve, shpeshherë të stërmëdha, mes tyre.
Përpos kësaj, janë qentë e rrugëve. Një lukuni e paparë, që e ndesh sot e gjithë ditën a natën në çdo cep të Tiranës. E pafund është prania e tyre, qoftë në qendër a në periferi të Tiranës. E në ka gjë që duhet të jetë mes përparësive të qeverisjes vendore është zgjidhja e kësaj çështje, pra, krijimi mundësi qytetarëve që të ecin rrugëve të Tiranës pa u ndjekur apo pa u parë vëngër nga tufa qensh të uritur.
Sterilizimi nuk është zgjidhje! Bashkia nuk mund të lajë duart me një sterilizim të tyre, ashtu siç mësohet së fundi se do të ngjasë. Erion Veliaj ka gjetur sterilizimin si dalje prej situatës, për t’ua lënë prapë nëpër këmbë qentë qytetarëve.
Vriten a nuk vriten, eliminohen apo jo, mblidhen apo nuk mblidhen në pika grumbullimi, e rëndësishme është që në rrugë të mos ndeshen më shumë qentë se njerëzit!
Ndryshe, jo shumë larg, do duhet që veç korsive për biçikleta, të shtohen në rrugë dhe korsitë për qentë.
Vërtet që eliminimi i qenve mund të mos jetë fort i këndshëm, por siguria e qytetarëve është më parësore. /tesheshi.com/
