Vendi ka kohë që është vënë nën situatë absurde ndërsa politika jep teatro me skenografi të ndryshme dhe aktorë të njëjtë. Duket si telenovelë me një seri, ku protagonistët përsërisin fjalët papushim.
Studiot televizive janë kthyer në llogore propagande, ndërsa partitë politike janë kthyer në kazerma ku krerët e tyre qëllojnë herë pas here nga frëngjia.
Partia Socialiste, si forca kryesore që qeveris vendin dhe ka përgjegjësinë të jetë në krye, është në heshtje të plotë. Ndërsa kryeministri është në SHBA, asnjë prej autoriteteve të larta të selisë rozë nuk ia mban të japë një qëndrim, të bëjë analizë apo të kërkojë mbajtjen e një qëndrimi për të gjithë trazirën që prej ditësh ka dalldisur publikun, politikën dhe mediat.
Grupi parlamentar është memec, ndërsa kreu i saj, Gramoz Ruçi është harruar edhe për fytyrë. Ish-kryeministrat, ish-ministrat apo deputetët e tjerë nuk kanë kurajo të japin edhe ndonjë këshillë. Forca politike që ka pasur hapësirë të madhe debati është kthyer në një pavijon ku askush nuk dëgjon e flet. Të paktën kryesia e partisë do të duhej të ishte mbledhur dhe të jepte qëndrimin politik.
E njëjtë është edhe panorama e opozitës: mbledhjet e grupit parlamentar janë një butafori më vete.
Lulzim Basha flet i mërzitur në fytyrë dhe deputetët luajnë me telefon ose tablet, ndërsa ditët e tjera deputetët apo zëdhënësat dalin në konferenca shtypi të mbushur me kameramanë ku pyetjet jo vetëm nuk njihen por në seli nuk shkelin as gazetarët. Çdo gjë bëhet në kaseta. Asnjë qëndrim kolegjial dhe vendim i përcaktuar qartë.
Ndërsa LSI që po përjeton bombardimin e akuzave, vetëm lëshon dhe përgjigjet me batare sipas frekuencës së të shtënave nga pala kundërshtare. Kjo forcë politike do të duhet të mbante qëndrimet më të qarta dhe kolektive në lidhje me gjithçka, por ka vetëm një situatë lufte, ku flitet për komplote, trimëri, spiunazh dhe konspiracion.
Kjo nuk është politike, madje as parapolitike, por një shkallë më lartë, në organizata të para-armatosura, para-luftarake…
y.pa /tesheshi.com/
