Është mëngjes. Shiu bie i ftohtë, ndërsa një rojë në urgjencën e Qendrës Spitalore të Tiranës të bën me dorë të largosh automjetin pasi po vjen një makinë policie. “Kemi një të sëmurë i themi”. Por roja nuk flet, i bie bilbilit.
Në korridorin e urgjencës kërkojmë një karrocë për të sëmurin që nuk lëviz dot.
Më në fund gjendet një dhe pacienti i dërrmuar arrin në një shtrat.
E kanë nxjerrë më 30 dhjetor nga spitali pasi në QSUT nuk duhet të qëndronte asnjë pacient. Mjekët kanë ikur jashtë për festat e fundvitit.
Por edhe sot nuk kanë ardhur akoma. “Është pushim thotë një infermiere”, ndërsa një mjek i ri me syze shikon letrat dhe thotë që “unë tani e mbyll turnin”.
Gruaja e pacientit, e rrënuar nga telashi thotë: “po bëjmë spedicion prej tre ditësh shtëpi-urgjencë, u grimë edhe me taksi. Na mbajnë vetëm dy minuta dhe më pas na nisin në shtëpi”.
Pacienti ka bërë një ndërhyrje në prostatë dhe i kanë vënë kateter, por barku i është bërë vrima vrima dhe gjithçka kullon jashtë.
Qesja e lidhur në bark nxjerr gjak, duke hequr dhe atë pak që ka mbetur në trupin e 75-vjeçarit të drobitur nga sëmundja dhe sorollatjet e mjekëve.
Pas një orë dikush kujtohet të bëjë një analizë. Kalon koha dhe vjen përgjigja: “ke anemi, do të shkosh në shtëpi, duku nga data 6 për konsultë dhe më pas do të vendosim çfarë të bëjmë.”
Gruaja e nxehur ia pret se nuk mund të largohet dhe nuk do të largohet pasi ka 3 ditë që tallen me të shoqin që mezi jep dhe merr.
Mjeku thërret rojen i cili vjen të vërë autoritetin. Dy djemtë e pacientit ia kthejnë me të egër: “si mund të largoni njerëzit nga spitali, kjo është e tmerrshme, a jeni njerëz!”
Roja nxehet më shumë dhe i bie telefonit, thërret patrullën e policisë. Ndërkohë që makina blu ia beh në derë, një nga djemtë i ka rënë numrit të Saimir Tahirit, Ministrit të Brendshëm.
Policët hyjnë te porta, u bie telefoni dhe u drejtohen familjarëve të pacientëve: “I sëmuri mund të qëndrojë në spital…”
Sa për info: para pak ditësh, drejtoresha e QSUT-së, Ogerta Manastirliu, u nderua nga Ministria e Zhvillimit Ekonomik me çmimin “Bleta e Artë”.
A kishte ndonjë “gjë të artë” në gjithë këtë mesele?!
/tesheshi.com/
