Enver Maloku, Xhemajl Mustafa, dhe Smajl Hajdari, janë vetëm tre nga bashkëpunëtorët e Presidentit të ndjerë, Ibrahim Rugova, e të cilët janë vrarë pas luftës në Kosovë. Analistët parashikojnë “heshtje të turpshme” të LDK-së dhe kryeministrit Isa Mustafa, për hetimet e vrasjeve të pasluftës…
Nga Jeton Llapashtica
Prishtinë – Familjarët e anëtarëve të Lidhjes Demokratike të Kosovës (LDK) të cilët janë vrarë që nga paslufta në rrethana të paqarta, dhe që vrasësit e tyre nuk janë zbuluar asnjëherë, duket se do ta marrin edhe një goditje tjetër.
Ndërkohë që janë duke u bërë të gjitha parapërgatitjet, gjegjësisht, hartimi i bazës ligjore për themelimin e Gjykatës Speciale, vazhdon të mbesë e paqartë nëse kjo gjykatë do t’i trajtojë vetëm krimet që janë bërë deri në fund të vitit 2000, apo edhe ato nga 1 janari i vitit 2001.
Gazetari Enver Maloku, publicisti Xhemajl Mustafa, deputeti Smajl Hajdari, janë vetëm tre nga bashkëpunëtorët e ngushtë të presidentit të ndjerë, Ibrahim Rugova, e të cilët janë vrarë pas luftës në Kosovë, ndërsa, pavarësisht se nuk janë përmendur emra të vrasësve, gishti çdoherë është drejtuar nga kundërshtarët politikë të Rugovës dhe LDK-së.
Prokurori amerikan Clint Williamson, i cili për tri vjet rresht ka bërë hetim mbi raportin e senatorit zviceran Dick Marty, mbi krimet e pretenduara se janë kryer nga Ushtria Çlirimtare e Kosovës, në raportin e tij i ka paraparë edhe krimet e bëra pas luftës në Kosovë, gjegjësisht, vrasjet politike.
Njëri nga anëtarët e LDK-së, Adem Salihaj, ndaj të cilit ishte bërë atentat pas luftës, ndërsa më vonë pat dalë që tentimi për vrasjen e tij ishte bërë nga Shërbimi Informativ i Kosovës (SHIK), gjatë një prononcimi për portalin TeSheshi ka theksuar se është më shumë e domosdoshme që Gjykata Speciale t’i trajtojë edhe vrasjet politike të pasluftës.
“LDK-ja ka qëndrim që duhet të hetohen dhe gjykohen krimet që janë bërë në periudhën gjatë luftës dhe pas saj, duke përfshirë këtu edhe krimet dhe vrasjet e veprimtarëve të LDK-së të kryera edhe në periudhën pas vitit 1999. Ne mendojmë se kjo do të ishte e arsyeshme, sepse, siç dihet, deri më tash këto krime kanë mbetur pothuajse të pazbardhura dhe të padënuara nga drejtësia. Siç dihet, drejtësia në Kosovë është e mbërthyer nga SHIK-u dhe krimi i organizuar në tërësi, kështu që tash për tash, por as në një të ardhme të afërt, nuk ka shanse që të gjykohen ato nga drejtësia kosovare”, thotë ai.
Deputeti Salihu thekson se prokurori amerikan Williamson i ka përfshirë në raportin e tij hetimor edhe disa krime politike që janë kryer pas lufte.
“Tash ,deri kur do të shkojë kjo periudhë e hetimit të krimeve, ne nuk e dimë dhe, me sa duket, nuk do të kemi mundësi të ndikojmë në këtë çështje”, thekson ai.
Rreth rrezikut që Gjykata Speciale mos t’i trajtojë fare vrasjet e anëtarëve të LDK-së prej paslufte e këndej, sot është deklaruar edhe deputetja e kësaj partie, Vjosa Osmani, e cila gjatë deklarimit jashtë rendit të ditës në seancën e fundit të Kuvendit të Kosovës, ka thënë se është e domosdoshme që kjo gjykatë t’i trajtojë edhe vrasjet e pasluftës.
“Unë kërkoj që delegacioni teknik i Kosovës ta bëjë këtë kërkesë dhe të insistoj që Gjykata Speciale të mos bëjë drejtësi selektive, pra mos të merret vetëm me një pjesë të raportit të Clint Ëilliamsonit e jo me raportin në tërësi, që siç e dimë aty shumë qartë thuhet se ka prova të mjaftueshme për disa vrasje të pasluftës të ngrihet aktakuzë”, ka thënë ajo.
Por, më ndryshe se Salihaj dhe Osmani mendon analisti politik, Nexhmedin Spahiu, sipas të cilit, problemi më i madh i Kosovës sikur dhe i çdo vendi në botë janë vrasjet politike.
“Ajo që është dëmtuar nga vrasjet politike është LDK-ja, dhe i takon më së shumti të kërkojë gjykimin e tyre. Por fatkeqësisht udhëheqjen e LDK-së e kanë marrë njerëzit e PDK-së dhe është e pritshme mos të kërkojnë të gjykohen ato nga Gjykata Speciale. Por është vështirë me prit prej gjykatave tona me i bë këto veprime pa e marrë pushtetin LDK-ja. E në situatën që e kemi nuk shoh një perspektivë që LDK-ja të mund ta marrë pushtetin, pasi që PDK-ja do të kujdeset që të ketë njeriun e vet në krye të LDK-së”, thotë Spahiu për portalin TeSheshi.
Sipas tij, elektorati i Lidhjes Demokratike të Kosovës është më i madhi në Kosovë, ndërsa thekson se pavarësisht se kush i fiton zgjedhjet ky elektorat përbën rreth shtatëdhjetë për qind të qytetarëve të frymës paqësore rugoviane. Ai thotë se zhgënjimi i “elektoratit rugovian” është me liderin aktual të Lidhjes Demokratike të Kosovës, Isa Mustafa, i cili, siç thotë ai, e tradhtoi elektoratin, pas së cilit pasoi ekzodi masiv i qytetarëve të papërfaqësuar në shoqërinë kosovare.
Kohë më parë familjarët e personave të vrarë pas luftës, kryesisht, anëtar të Lidhjes Demokratike të Kosovës, kanë protestuar në Prishtinë, duke kërkuar që të hetohen dhe sillen para drejtësisë vrasësit e familjarëve të tyre./TeSheshi/
