Nga Blendi Gashi
Për të “n”-ën herë në historinë moderne të njerëzimit, u përdorën vezët për të kundërshtuar dikë, një politikë të caktuar; dhe as kësaj here askush nga kundërshtuesit e aktit, nuk tha të paktën një fjalë se përse një ushqim, siç janë vezët, për të cilat kanë nevojë sa e sa njerëz të pamundur, duhet të përdoren si plumba për të qëlluar dikë.
Më e shëmtuar se akti i të qëlluarit me vezë, është vetë veza si produkt ushqimor i përdorur për këtë qëllim. Edhe me lëvozhga shalqini sikur të ish qëlluar, nuk do ish gjë e mirë, derisa dhe ato mund të bëhen reçel, pra ushqim për njerëzit. Dhe para se të debatohet mbi faktin nëse duhej apo jo të qëllohej kryeministri Mustafa si formë jo orale e kundërshtisë për një firmë që ka hedhur në Bruksel, problemi duhej të shtrohej se pse duhen çuar dëm vezët si ushqim, ndërkohë që fare mirë mund të zëvëndësoheshin me këpucë…kokës, edhe pse kjo formë nuk është e pëlqyeshme, derisa është shprehi dhune.
Partitë opozitare të cilat në seancën e sotme ndërprenë fjalimin e kryeministrit Isa Mustafa, në momentin që deklaroi se marrëveshjet e arritura në Bruksel janë kushtetuese dhe ligjore, thonë se reagimi i tyre është vetëm fillimi, derisa kryeministri nuk merr vendim për ta tërhequr nënshkrimin.
Lëvizja ‘Vetëvendosje’, pas ndërprerjes së seancës, thotë se deputetët e opozitës ia ndalën gënjeshtrën Isa Mustafës, përmes së cilës ai synonte që edhe njëherë t’i gënjejë qytetarët dhe deputetët për marrëveshjet e Brukselit.
“Isa Mustafa sërish po i trajton deputetët dhe qytetarët si të padijshëm. Veprimet e tij janë tallje dhe shpërfillje e Kuvendit, ashtu siç marrëveshjet e Brukselit janë rrënim i Republikës”, ka thuhet në kumtesën e VV-së.
Deputetja e AAK-së, Donika Kadaj-Bujupi ka thënë se veprimet e ndërmarra në seancën e sotme janë vetëm nismë për një kryeministër që sillet për interesa të shteteve të tjera dhe jo për shtetin e vet.
“Është mënyra e vetme dhe më e vogla që mund të bëjmë që ta ndalim këtë kryeministër që nuk po e respekton mandatin e deputetëve. Kuvendi nuk është vendi ku ju vini dhe informoni për shkeljet që i keni bërë në kundërshtim me interesat e qytetarëve. Ne e thërrasim kryeministrit në vij në Kuvend dhe derisa ne jemi aty nuk do të lejojmë që të paraqitet situata normale. Në vazhdimësi do të kundërshtojmë, dhe do të jemi aty për të kundërshtuar marrëveshjet”, ka thënë Bujupi
Armend Zemaj, deputet i LDK-së, poashtu për RTK-në ka dekalruar se Kuvendi është vend i argumenteve dhe debateve që përfaqëson interesat e qytetarëve.
“Si demokraci e re nuk e kemi luksin e teatrove të tilla. Pavarësisht sjelljeve të kqija, puna e institucioneve do të vazhdon. Për format e tilla mendoj se janë të nivelit më të urtë. Poashtu është një menaxhim i keq edhe nga ana e kryetarit të Kuvendit”, tha Zemaj.
Deputeti i PDK-së, Adem Grabovci, thotë se është kryesia do të vendosë nëse do të vazhdojë seanca ose jo. Ai ka thënë se seanca do të vazhdojë sot dhe kryeministri do të raportojë sot për marrëveshjet e arritura në Bruksel.
Deputeti i LDK-së, Ismet Beqiri, në një dekalrim për RTK-në ka deklaruar se sjelljet e opozitës s’kanë të bëjnë asgjë me demokracinë. ‘Këta opozitarë lëre që s’kanë alternativë, por as ta dëgjojnë mendimin ndryshe’, tha ai.
/tesheshi.com/
