Lëvizja Vetëvendosje ka reaguar ndaj dhunës së Policisë kundër protestuesve në Maqedoni duke thëne se po ndjek me interes dhe solidaritet protestat e fundit në Maqedoni.
“Këto protesta drejtohen kundër qeverisë së Nikolla Gruevskit, i cili ka ndërtuar në rajonin tonë një regjim të bazuar mbi shërbimet sekrete, spiunazhin, dhunën policore dhe racizmin institucional në dëm të shqiptarëve. Qeveria po përdor aparatin e saj represiv për të plagosur e rrahur masivisht protestuesit. Nuk është e drejtë që të mbrohet një racist si Gruevski përmes dhunës ndaj protestuesve”, thuhet në deklaratën e LVV.
Po ashtu sipas LVV, Qeveria e Gruevskit, pas publikimit të përgjimeve, e ka humbur çfarëdo legjitimiteti për ta qeverisur vendin. Përgjimet na treguan se si qeveria drejtohet nga disa gangsterë, të cilët i konsiderojnë shqiptarët si qytetarë të rendit të dytë, apo edhe më keq.
“Qeveria e Gruevskit e ka varfëruar popullin shqiptar në Maqedoni, është përpjekur të spastrojë disa zona ku shqiptarët jetojnë prej shekujsh, e ka distancuar atë në investime e në buxhet, dhe e ka getoizuar atë.”
LVV akuzon qeverinë e Gruevskit e cila përmes lidhjeve të ngushta me Serbinë ka vepruar kundër shqiptarëve dhe njëkohësisht kundër interesit strategjik për zhvillim e siguri që ka rajoni, ndërkohë që përmes gjyqeve të montuara i ka trajtuar shqiptarët si terroristë.
LVV ka apeluar shqiptarët në Maqedoni që të kërkojnë vazhdimisht barazi, dhe të mos kënaqen me asgjë më pak. Shqiptarët në Maqedoni nuk janë pakicë, as popullatë, por janë komb që duhet të marrë të drejtat e përgjegjësitë politike që i takojnë. Këtë shqiptarët do të duhet ta kërkojnë edhe nga opozita maqedonase, dhe nga secila forcë që në të ardhmen do të kërkojë bashkëpunimin e shqiptarëve për të ardhur në pushtet.
Por aktualisht është e rëndësishme të kuptohet se asnjë shqiptar, e as partitë politike shqiptare si BDI-ja që janë identifikuar me Gruevskin, nuk mund të ketë justifikim për ta mbrojtur Gruevskin, këtë varfërues, izolues, diskriminues dhe internues të shqiptarëve.
“I bëjmë thirrje shqiptarëve në veçanti të kuptojnë se nëse janë të përgatitur për pjesëmarrje në protesta kundër qeverive të krimit, ata janë po aq të vlefshëm edhe për ndërtimin dhe definimin e të ardhmes së shtetit.
Protesta e shqiptarëve nuk lind dhe as drejtohet nga nevoja e elementit maqedonas, as nga masa e korrupsionit shtetëror, por nga arbitrariteti konstant ndaj popullit shqiptar. Shqiptarët duhet t’i mbështesin protestat kundër Gruevskit, sepse këto protesta mund dhe duhet të krijojnë një hapësirë të re në Maqedoni. Asnjë qeveritar i ardhshëm nuk do të duhet të guxojë e nuk duhet të lejohet të bëjë me shqiptarët atë që bën Gruevski.”
