Me rastin e 7-vjetorit të Kushtetutës së Republikës së Kosovës, Lëvizja Vetëvendosje! përmes një aksioni simbolik ka treguar për mangësitë dhe moszbatimin e Kushtetutës gjatë këtyre viteve duke e kritikuar ashpër edhe kryetarin e kësaj gjykate, Enver Hasani.
Një grup aktivistesh të Vetëvendosje!-s ka vendosur të enjten para objektit të Gjykatës Kushtetuese një pankartë në të cilën shkruante “Kushtetuta e Republikës së PDK-së”, ndërsa sipër saj ishte vendosur edhe fotografia e kryetarit të Gjykatës Kushtetuese, Enver Hasani.
Aktivisti Zgjim Hyseni ka thënë se në vend se Kosova të shënonte progres në ndryshim të neneve të Kushtetutës të cilat i shkelin të drejtat e qytetarëve të Kosovës, ajo u ndryshua sa herë që i duhej dhe i konvenonte pushtetit.
Ai ka thënë se Me Enver Hasanin si kryetar të Gjykatës Kushtetuese, Kushtetuta e Republikës së Kosovës është shndërruar në instrument që i hap rrugën dhe e legalizon praninë e Serbisë në Kosovë, por edhe i zgjatë jetën pushtetit të PDK-së.
“Enver Hasani i ka shërbyer PDK-së kur ka bërë interpretimin për grupin më të madh parlamentar, i ka shërbyer edhe kur ka interpretuar mbi mandatarin e Qeverisë, por kulmi i skandaleve të tij është falsifikimi i kuorumit që ka bërë me rastin e zgjatjes së mandatit mbi gjyqtarët ndërkombëtarë. Me këtë rast nuk po flasim për shkelje procedurale, por kemi të bëjmë me vepër penale”, ka thënë Hyseni, njofton zyra për informim e VV-së.
Hyseni ka thënë se është e papranueshme që aktin më të lartë juridik e politik të shtetit ta lemë në dorë të një njeriu aq të ulët si Enver Hasani. Që Kushtetuta ku afirmohet integriteti territorial e institucional të mbetet në mëshirën e një aparatçiku pa integritet si Enver Hasani.
Ai ka thënë se kjo është edhe një arsye më shumë pse duhet protestuar më 18 prill kundër kapjes së shtetit. /tesheshi.com/
