Nga Ylli Pata
Ka mbi një javë që ka ndodhur një anomali e madhe me kandidaturat për Këshillin e Lartë Gjyqësor dhe Këshillin e Lartë të Prokurorisë dhe media e politika nuk i ka dhënë peshën e duhur.
Çka ndodhur?
Sipas procedurës, kanë paraqitur pranë Avokatit të Popullit kandidaturat një numër juristësh, të cilët u renditën sipas kritereve dokumentare që ata plotësonin.
Të gjithë kaluan në sitën e OMN-së, e cila dha një verdikt të caktuar.
Pas ndërkombëtarëve, Sekretari i Përgjithshëm i Kuvendit paraqiti një raport që më shumë ngatërroi punë sesa sqaroi; nxori tre emra që kanë dalë pa cen nga vettingu, por që kishin cene me pjesë të tjera të kritereve.
Në fund të gjithë kandidaturat shkuan në Kuvend.
Gjeja më pozitive e këtij procesi është se komisioni i vettingut u mbodh i plotë, pra PS+PD+LSI.
Por në Komision, asnjë kandidat, asnjë, nuk mori shumicën e votave dhe të gjithë, edhe ata që u renditën mirë nga vettingu edhe ata që u renditën jo mirë, shkuan në seancë.
PD-ja sot sulmoi një pjesë të kandidatëve, duke e përdorur publikisht procesin dhe i quajti si “pranë Edi Ramës”.
PD-ja sulmoi Altin Hazizajn, kandidat për Këshillin e Lartë Gjyqësor nga Shoqëria Civile dhe një tjetër kandidat, i cili dikur kishte dalë me njollë si spiun i Sigurimit, si dhe ka qenë kryetar i Partisë Komuniste të Lushnjës.
Epo këtu ka një nonsens total, pasi të gjithë anëtarët e komisionit të vettingut janë juristë me eksperiencë.
Ulsi Manja ka qenë Prokuror, Nasip Naço ka qenë Prokuror, Oert Bylykbashi është jurist me përvojë të rëndësishme në administratë, Vasilika Hysi është juriste dhe pedagoge me eksperiencë.
Ç’do të thotë kjo?
Do të thotë që vota abstenuese e Ulsi Manjas, Nasip Naços dhe Oert Bylybashit lë një shije të hidhur. Kandidaturat për në KLP dhe KLGJ janë startimi, inagurimi i reformës në drejtësi.
Dhe në këtë rast duhet të prodhojmë ekselencë, pra njerëz, juristë që meritojnë të drejtojnë organet e qeverisjes së prokurorisë dhe gjykatave.
Sot opozita sulmoi Altin Hazizajn si një njeri të dënuar që nuk meriton të kandidojë. Altini, kush e njeh e di se ai nuk është një “i fortë” që mund të sulmojë apo larg qoftë të vrasë. Vendimi i gjykatës ka të bëjë me punën e tij si gazetar i “Koha Jonë” i vitit 1994 kur Berisha e sulmonte median kundërshtare.
Altin Hazizaj mund të jetë një avokat i devotshëm i çështjes së LGBT-së, por nuk ka lidhje me drejtësinë. Si gazetar, ai kurrë s’ka bërë një shkrim për gjyqësorin problematik, për “Plepat” apo edhe thelbin e gjyqësorit. Altini është djalë paqësor, por s’ka fare lidhje me gjyqësorin shqiptar. Nuk e ka ndjekur. Edhe nëse emërohet, do të jetë si “peshku në të thatë”.
Ky duhet të ishte objeksioni i opozitës dhe jo ajo që Altini është me Ramën. Hazizaj nuk është politik, madje është transpolitik edhe më shumë trans seç ne e mendojmë, po kjo s’ka lidhje.
Po si duhet të veprohet? E thjeshtë. Kandidatët për KLP-në dhe KLGJ-në duhet të jenë njerëzit më të aftë, më të pakorruptuar, më me integritet për të vendosur për emërimin e gjyqtarëve dhe prourorëve. Kaq!
Kriteret në vetting janë të qarta: renditen së pari kandidatët që plotësojnë kushtet e 15-vjetorit në përvojën e tyre. Më pas vjen pastërtia e figurës.
Nëse kandidatët rrëzohen nga vettingu, duhet të nisin nga e para, nuk mund të qarkullojnë ata që nuk plotësojnë kriteret.
Në KLP e KLGJ duhet të zgjidhen më të mirët dhe më të ndershmit që plotësojnë kriteret dhe kalojnë vettingun; ndryshe procesi nis nga e para.
Këta janë kandidaturat që thyejnë akullin dhe nuk lejojnë devijim, dhe që duhet të përfaqësojnë ekselencë! /tesheshi.com/
