Nga Blendi Gashi
Kreu i PDK-së Kadri Veseli, më 8 shtator të këtij viti pas rizgjedhjes kryekuvendar paralajmëroi se do të ndjek shembullin e Shqipërisë ku partia e tij do të punojë për një ligj Vettingu.
“Kam biseduar edhe me mandatarin për çështjen e Vettingut i cili do të përfshijë jo vetëm sistemin e drejtësisë dhe sigurisë por edhe atë politik. Propozimi ynë do të jetë shumë i qartë për të gjithë ne në politikë por edhe për të gjithë familjarët tanë që të dihet saktësisht se cila është e vërteta”, tha Veseli pa dhënë detaje nëse këtë vit do të synohet të miratohet ky ligj.
Ky propozim i Veselit po shihet me skepticizëm nga opozita, ndërsa organizatat joqeveritare nuk besojnë se do miratohet gjatë këtij viti.
Deputeti i Vetëvendosje-s, Sami Kurteshi, thotë se ngritja e një çështje si puna e ligjit të Vettingut nga Veseli në gjendjen aktuale, është kryekëput dhe një dëshmi më shumë për mungesë idesh konkrete për veprim politik.
“Kjo ‘ide’ e vjedhur, apo në rastin më të mirë, e kopjuar në stilin ‘copy-paste’, as mund të fillohet, as mund të bëhet, as mund të realizohet, nga njerëz që janë pjesë dhe që drejtpërdrejtë kanë ndërtuar një sistem shtetëror të kriminalizuar. As vetë ai, dhe as të gjithë ata që e kanë ‘këshilluar’ për të deklaruar diçka të tillë, nuk kanë as potencial ligjor, as moral, as politik dhe as intelektual për të bërë një veprim të tillë, në kuptimin e mirëfilltë, pozitiv të konceptit. E vetmja gjë që mund të bëjnë pushtetarët e sotëm dhe, nuk duhet përjashtuar se edhe e synojnë këtë, është pikërisht e kundërta e ‘Vettingut’ në kuptimin e mirëfilltë dhe thelbësor të konceptit: largimin e të gjithë njerëzve të ndershëm, të punësuar në administratën shtetërore të Republikës së Kosovës, me qëllim të kapjes totale dhe të kontrollit total të administratës shtetëror nga klanet e organizuara kriminale, të ndara sipas sferave të interesit të këtyre klaneve”, thotë Kurteshi për tesheshi.com.
Sipas tij, asnjë lojë e ngjashme nuk mund të shpërqendrojë vëmendjen gjithnjë e më të fokusuar të qytetarë për domosdoshmërinë e ndryshimit nga gjendja e mjerueshme në të cilin e kanë katandisur Kosovën të gjitha pushtetet e deritanishme të pasluftës.
“Ky ndryshim po vjen. Zgjedhjet lokale dhe fitorja e madhe dhe e pashmangshme e Vetëvendosjes është e dukshme në horizont. Dhe ky është tmerri i këtyre pushtetarëve të kriminalizuar. Koha dhe momenti i Vettingut të vërtetë, në kuptimin e dekriminalizimit të shtetit nga pushteti i kriminalizuar në Kosovë, po vjen”, thotë Kurteshi.
Vettingu pa opozitën jo i besueshëm…
Ehat Miftaraj, nga Instituti i Kosovës për Drejtësi (IKD) thotë se organizata e tyre në vazhdimësi në raportet e saj ka kërkuar që Kosova të zhvilloi një proces të ri të verifikimit (Vettingut) për gjykatës dhe prokuror.
Ai thotë se iniciativa e kryeparlamentarit Veseli për një Vetting gjithpërfshirës jo vetëm në sistemin e drejtësisë por edhe atë të sigurisë duhet përshëndetur, por duhet të pritet nëse do zbatohet në praktikë.
“Procesi i tillë kërkon një analizë të thellë, përfshirje të gjithë akterëve përkrahës dhe koncensus politik. Andaj edhe ky proces nuk mund të pritet që të përfundoj brenda vitit. E vetmja mënyrë qe kjo iniciativë të funksionoj duhet të kemi një debat publik ku pozita dhe opozita të arrijnë pajtim lidhur me mënyrën e realizimit të këtij procesi. Ky proces nuk mund dhe nuk duhet të realizohet vetëm nga partitë në pushtet, pasi besueshmëria në këtë proces do të kompromitohej”, thotë Miftaraj për tesheshi.com. /tesheshi.com/
