Partia Demokratike ka vendosur që ta ridërgojë në Gjykatën Kushtetuese ligjin e vettingut, që kjo e fundit ta çojë sërish në Komisionin e Venecias, kërkesën për të marrë një opinion.
Veprimin e ka bërë të ditur kryetari i Partisë Demokratike, Lulzim Basha gjatë një mbledhje të grupit parlamentar të mërkurën paradite.
Madje përpara se të marrë vendim, Basha ka komunikuar me Kushtetuesen ku ka bërë edhe kërkesën formale.
Kjo lëvizje e PD-së vjen pasi mësohet se ka mbërritur në Tiranë një opinion nga Venecia i cili thotë se vetttingu është në rregull dhe duhet të zbatohet.
Realisht, opinion i ekspertëve konstitucionalistë të Këshillit të Europës pritej, pasi ata njëherë e kanë dhënë “ok” për të gjithë reformën në drejtësi, ku natyrisht përfshihet edhe vettingu.
Madje atëherë, Lulzim Basha e cilësoi fitore pasi tha se Venecia “ndali vrullin e Edi Ramës për të kapur drejtësinë”. Por papritur e papandehur PD paditi vettingun në Kushtetuese duke hyrë në përplasje me SHBA dhe BE që ishin autorët e vërtet të tij dhe në një farë mënyre edhe zbatuesit e këtitj procesi delikat që është dhe zemra e reformës pa të cilën kjo e fundit nuk vlen.
I gjithë ky operacion ka bërë që të vonohet në kohë zbatimi i refomës në drejtësi dhe seleksionimi i gjykatësve dhe prokurorëve të rinj, ndërkohë kur prokuroria aktuale është e pezulluar nga hyrja në fuqi e ligjeve të reja të reformës.
Dhe këtë të mërkurë të 30 nëntorit, PD rinis edhe njëherë këtë qark vicioz me justifikimin se ka pasur gabime në përkthim në materialin që është dërguar në Venecia.
Por kjo është një lojë pak të thuash jo serioze, pasi Venecia e ka parë dy herë këtë variant dhe nuk ka përse të ketë gabim në përkthim.
Do të ishte shumë më e sinqertë dhe më normale sikur PD të thoshte hapur dhe qartë se vettingu nuk është i pranueshëm për të dhe ta shpallë atë si pjesë të pavlefshme, duke kërkuar mosnjohjen e tij.
Edhe pse do ta vinte opozitën kundër SHBA dhe BE, që tashmë ka ndodhur, nuk do të ishte ndonjë gjëmë, pasi ajo gjithsesi ka dhe mendimin e vet brenda kontureve të një politikëbërje normale dhe nuk ka pse kompleksohet në këtë pikë; dhe të bënte luftën politike për të mos u zbatuar.
Kjo sepse të shpallësh njëherë fitoren se Venecia shpëtoi reformën dhe më pas të shpallësh se Venecia e ka gabim, do të thotë se “e humbur në përkthim” është PD.
E humbur pasi nuk ka përkthyer si duhet mesazhin politik të sajin, por edhe të ndërkombëtarëve.
Madje do të ishte më e ndershme fare, që meqë është një çështje sensitive, pasi heq nga puna 1 mijë prokurorë e gjyqtarë që kanë punuar për 25 vjet, opozita të kërkonte ta zgjidhte dhe me referendum popullor.
Kur palët kanë përplasje a nuk do të ishte më mirë që këtë çështje ta zgjdhë verdikti i popullit?!
/tesheshi.com/
