Komsioni ad-hoc i ngritur në seancën e jashtëzakonshme të Kuvendit pas marrëveshjes mes dy partive të mëdha ka nisur punën me debate për miratimin e kandidatëve që do të bëjnë vettingun në drejtësi.
PD dhe LSI janë shfaqur në një gjatësi vale duke kritikuar listën e sjellë pas kalimit në sitë nga Operacioni Ndërkombetar i Monitorimit dhe Avokati i Popullit.
Përfaqësuesit e PD-së dhe LSI-së e cilësuan listën me dy standarde.
Deputeti demokrat Flamur Noka tha se niveli i këtyre kandidatëve lë shumë për të dëshiruar.
“Keni parë nivelin e asaj liste. Edi Rama pretendon të paraqesë juristë të fabrikave të këpucëve, rrobaqepësive, apo që nuk kanë mbrojtur asnjë çështje. Kishte dy persona në konflikt të pastër interesi dhe që ONM i kishte kualifikuar. Kishte disa persona të tjerë identik me këta që ishin skualifikuar. Komisioni ynë kishte marrë vendim politik për të kaluar listën që kishte urdhëruar Edi Rama” – tha pas mbledhjes së sotme që zgjati 3 orë.
Deputeti i LSI-së, Luan Rama, mbështeti opozitën dhe tha se ka një defekt në ligj.
“Dikush që ka vëllanë apo burrin në sistem, i jep dot vlerësim negativ? Kjo është shprehje flagrante e aplikimit të dy standardeve, subjektivizmit dhe papërgjegjshërisë në zgjedhje. Më vjen mirë që dhe PD ka ndarë të njëjtin shqetësim, pasi ky është qëndrim parimor ndaj procesit të zgjedhjes. Procesi i përzgjedhjes rezultoi të ketë mangësi”-tha ai.
Ulsi Manja i PS-së dhe kryetari i këtij komisioni mbrojti listën dhe ligjin.
Lista kryesore përbëhet nga 68 kandidatë, mes te cilëve dy komisionet e tjera do të përzgjedhin 27 kandidatë që do të jenë pjesë e komisioneve të vettingut./tesheshi.com/
