Ina Rama dhe Shpresa Beçaj, dy gra të forta të drejtësisë shqiptare, i kanë shpëtuar sitës së parë të vettingut, duke u kualifikuar për në fazën e parë; veçse kujdes, nuk ka qenë vetting real, por shqyrtimi i dokumenteve që kanë paraqitur!
Këto kritere i ka hulumtuar Avokati i Popullit, i cili ka publikuar listën ku nga 192 aplikantë, 136 nuk i plotësojnë kriteret dhe 29 janë në rregull me letrat.
Pasi ka përfunduar verifikimi i dokumentacionit të kandidatëve, bie në sy se në listën e të pranuarve janë edhe Albana Shtylla, sekretare e përgjithshme e Kuvendit, ish-kryeprokurorja Ina Rama, Shpresa Beçaj, ish-kryetare e Gjykatës së Lartë, dhe ish-anëtari i KLD-së, gjykatësi Sokol Çomo. Kurse nga të skarcuarit bien në sy ish-kryepolici rrugor, dhe më pas shefi i rojeve të Nishanit, Krenar Ahmeti, e ish-zv.kryeprokurori në vitet 1992-96, Fatos Dervishi.
Avokati i Popullit verifikoi për një javë 192 aplikime, nga të cilat nëntë prej tyre i kanë përmbushur kriteret formale për një pozicion në KLGJ apo KLP, ndërsa 163 aplikime nuk i kanë përmbushur kriteret për secilin pozicion. Ky proces është zhvilluar nën monitorimin e pandërprerë të ekspertëve ndërkombëtarë të ONM-së.
Në përfundim të këtij procesi, Avokati i Popullit i ka dorëzuar Operacionit Ndërkombëtar të Monitorimit listat e kandidatëve, si dhe të gjitha dosjet individuale fizike të aplikimeve të shqyrtuara për këta kandidatë.
Vlerësimi dhe rekomandimet për kandidatët nga Operacioni Ndërkombëtar i Monitorimit do t’i përcillen Avokatit të Popullit, që së bashku me dy listat e sipërcituara do t’ia dorëzojë më pas Kuvendit të Shqipërisë. /tesheshi.com/
