Angela Merkel dërgon me urgjencë në Tiranë një zyrtar të lartë, pikërisht ditën kur Gjykata Kushtetuese duhet të marrë në shqyrtimin ligjin e vettingut, të vetmin kusht të BE-së për Shqipërinë dhe investimin real të gjermanëve për të spastruar gjyqësorin në vend.
Pas vizitave zyrtare të Edi Ramës së Ditmir Bushatit në Berlin, ku janë takuar përkatësisht me kancelaren Angela Merkel dhe Ministrin e Jashtëm Frank Walter Steinmeier, një shkëmbim tjetër diplomatik i nivelit të lartë gjermano-shqiptar zhvillohet këtë të hënë.
I dërguar nga kancelarja Merkel, mbërrin në Shqipëri për një vizitë zyrtare Sekretari i Shtetit për Marrëdhëniet me BE-në, Michael Roth, i cili përveç një takimi me shefin e diplomacisë shqiptare, Ditmir Bushati, do të takohet me kryeministrin Edi Rama, Presidentin Nishani dhe liderin e opozitës Lulzim Basha.
Vettingu dhe shqetësimi i Berlinit për vonesën e implementimit të ligjit për vlerësimin e gjyqtarëve pritet të jetë tema kryesore e diskutimit të diplomatit gjerman.
Loja politike e mesazheve të Berlinit pas vizitës së Ramës, ku disa qarqe politike këtu kanë dhënë intepretime në kontekste sipas leximit të tyre, pritet të jetë në fokus të deklaratave të Roth.
Por ajo që mund të lexohet si mesazh i qartë politikë, është se kjo vizitë zhvillohet në të njëjtën ditë kur Gjykata Kushtetuese do të nisë shqyrtimin e ankesës së PD-së për të hedhur poshtë ligjin e vettingut. /tesheshi.com/
