Këshilli i Qarkut Kukës, në mënyrë të paprecedent i hoqi Veton Surroit titullin “Qytetar Nderi”, dhënë në 2015-ën për publicistin e njohur kosovar, me pretendimin se ai, ne qasjet e tij, po godet UÇK-në.
“Deklaratat e vazhdueshme që Surroi po jep kundër luftës çlirimtare të Kosovës por dhe në përgjithësi udhëheqjes, pas disa debateve në Këshill u vendos heqja e këtij titulli për Veton Surroit. Pas disa diskutimesh dolëm në konkluzionin se ajo çfarë po bën Surroi shkon në kundërshtim me vlerat universale patriotike të qarkut të Kukësit duke sulmuar luftën e drejtë të UÇK-së. Ky propozim erdhi nga dy intelektualë”, tha Abdullah Domi, kreu i Qarkut Kukës.
Pro këtij vendimi qe dhe kryebashkiaku Gjici, i cili tha se “ai del kundra dhe del ndesh politikave dhe shtetit të Kosovës dhe ne ta mbajmë ‘Nderi i Qarkut?’”.
Por për eprorin e tij politik, kjo është e papranueshme, madje “një lajthitje kolektive”.
“Vendimi i Këshillit të Qarkut të Kukësit për heqjen e titullit ‘Qytetar Nderi’ Veton Surroit është një lajthitje kolektive që uroj Prefekti do ta refuzojë!
Ndërkohë parlamenti duhet të ndërhyjë për ta normuar njëherë e mirë çështjen e titujve e të medaljeve.
Ky vend s’mund të jetë një planet më vete brenda botës që e ka sistemuar me kohë e me vakt këtë punë, ku s’ka president që jep medalje për heronjtë e luftrave të shkuara se kështu i thotë koka dhe s’ka këshill që ia heq titullin dikujt me kërkesë të disave! Boll me këtë absurd”, shkruan Rama. /tesheshi.com/
