Vetmia dhe izolimi social mund te ketë ndikim në shëndet në disa mënyra, dhe hulumtimet e reja tregojnë se ajo mund të dëmtojë seriozisht zemrën.
Përderisa vetmia më parë ka qenë e lidhur me tensionin e lartë të gjakut, sistemin e kompromentuar të imunitetit dhe madje edhe vdekjen e hershme, lidhja e saj me problemet e zemrës sikurse sëmundjet kardiovaskulare dhe sulmet në tru, nuk kanë qenë aq të qarta.
Për të kuptuar lidhjen e mundshme, kërkuesit nga Londra kanë bërë hulumtime në 16 databaza dhe kanë gjetur 23 studime në lidhje me temën të cilat përputhen me kriteret për analizë. Këto studime kanë përfshirë më shumë se 180,000 të rritur të cilët kanë qenë të monitoruar përgjatë periudhave kohore prej 3 deri 21 vjet. Prej pjesëmarresve, pak më shumë se 4,600 kanë pasur manifestim të sëmundjeve koronare siç janë sulme të zemrës, sulme të anginës (dhembje e shkaktuar nga mungesa e oksigjenit ne muskulin e zemrës), apo vdekje të shkaktuar nga sëmundjet e zemrës ndërsa mbi 3000 kanë pësuar sulm në tru.
Analizat e të dhënave tregojnë se të rriturit të cilët kanë pasur më pak kontakte sociale apo janë ndier të pakënaqur me lidhjet sociale kanë pasur 29 përqind më shumë gjasa të pësojnë sulm në zemër apo anginë dhe 32 përqind e tyre sulm në tru.
Autorët kanë vërejtur se efekti ka qenë i krahasueshëm me faktorët tjerë të njohur të riskut për telashet me zemër, përfshirë ankthin dhe stresin në punë.
Është me rëndësi të ceket se studimi tregon vetëm për asociim dhe nuk dëshmon lidhjen shkak-pasojë. Megjithatë, studiuesit thonë se gjetjet mbështesin shqetësimet e shëndetit publik në lidhje me rëndësinë e lidhjeve sociale për shëndetin dhe mirëqenien.
“Puna jonë sugjeron që adresimi i vetmisë dhe izolimit social mund të ketë rol të rëndësishëm në parandalimin e shkaqeve kryersore të sëmundshmërisë në shtetet me të hyra të larta,” shkruajnë ata.
Ne editorialin shoqërues, Dr. Julianne Holt-Lunstad dhe Dr. Timothy Smith nga Universiteti i Brigham Young thonë se gjetjet “janë në përputhje me studimet duke dhënë indikacion për rreziqet e shumta për shëndetin” dhe argumentojnë se lidhjet sociale duhet të zënë vend të konsiderueshëm në edukimin mjekësor, vlerësimin individual të riskut dhe direktivat duke informuar personelin në lidhje me praktikat më të mira në ofrimin e kujdesit.
Sidoqoftë, ata tërheqin vërejtjen se përpilimi i një ndërhyrjeje efektive është një sfidë e madhe – posaçërisht kur merret parasysh varshmëria ndaj teknologjisë dhe mediat sociale në ditët e sotme.
“Me ndryshime të këtilla të përnjëhershme në mënyrën si njerëzit bashkëveprojnë, studimet empirike janë të nevojshme për të adresuar disa çështje me rëndësi. A e zëvendëson kontakti social përmes teknologjisë kontaktin fytyrë më fytyrë dhe/ose a i ndryshon ajo aftësitë sociale?” pyesin ata.
Në fund të fundit, ata argumentojnë se çështjes së vetmisë dhe izolimit social duhet dhënë vendin njejtë sikurse faktorëve tjerë të riskut për sëmundje të zemrës.
“Ngjashëm me atë se si kardiologët dhe profesionistët tjerë kanë qëndrim të zëshëm publik në lidhje me faktorët tjerë rëndues [për sëmundjet kardiovaskulare], siç janë pirja e duhanit dhe dietat me yndyrëra të ngopura, një vëmendje shtesë ndaj lidhjeve sociale është e nevojshme në studimet dhe vëzhgimin e shëndetit publik, si dhe në dhe përpjekjet për parandalimin dhe ndërhyrjet eventuale,” përfundojnë ata. /tesheshi.com/
