Djali më i madh i udhëheqësit revolucionar kuban, Fidel Castro, Fidel Castro Diaz-Balart, është vetëvrarë në moshën 68-vjeçare, pas rënies në një gjendje depresive, raportojnë mediat shtetërore kubane.
Castro Diaz-Balart, i njohur edhe si “Fidelito” për shkak të përngjasimit me të atin e tij, fillimisht ishte shtruar në spital për depresion dhe më pas vazhdoi trajtimin ambulator.
“Castro Diaz-Balart, i cili trajtohej nga një grup mjekësh për disa muaj për shkak të një depresioni të thellë, bëri vetëvrasje këtë mëngjes,” njoftoi të enjten ueb-faqja Cubadebate.
Fidelito ka lindur në vitin 1949 nga martesa e babait të tij me Mirta Diaz-Balart para se ai të rrëzonte një diktator të mbështetur nga SHBA dhe të ndërtonte një shtet të drejtuar nga komunistët gjatë periudhës së Luftës së Ftohtë.
Një fizikant bërthamor që studioi në ish-Bashkimin Sovjetik, Castro Diaz-Balart kishte punuar si këshilltar shkencor në Këshillin Kuban të Shtetit dhe nënkryetar i Akademisë Kubane të Shkencave.
Më parë, nga viti 1980 deri në 1992, ai ishte kreu i programit kombëtar bërthamor të Kubës dhe drejtoi zhvillimin e një centrali bërthamor në ishullin më të madh të Karaibeve.
Vdekja e tij erdhi një vit pas asaj të babait të tij më 26 nëntor 2016, i cili vdiq në moshën 90-vjeçare. /tesheshi.com/
