Deputetët e Vetëvendosjes, Mytaher Haskuka dhe Ismajl Kurteshi vlerësuan se ky vit shkollor po fillon me problemet që e kanë shoqëruar arsimin në Kosovë në vazhdimësi, e veçmas gjatë viteve të fundit.
Gjatë një konference për mediat, ata thanë se përkundër premtimeve për investime në arsim, ato vetëm sa u zvogëluan nga Qeveria aktuale.
Kurteshi përmendi edhe nevojën për ndërtimin e shkollave të reja, sidomos atje ku mësimi po zhvillohet në tre turne, e orët e mësimit po zgjasin vetëm 30 minuta.
“Është i domosdoshëm, zëvendësimi i shkollave kontejner ose baraka, me shkolla të reja që i plotësojnë kushtet për zhvillim e rregullt të mësimit. Po ashtu edhe investimi në pajisjen e shkollave me laboratorë e kabinete, si dhe mirëmbajtjen e tyre, por edhe ndërtimi i sallave dhe fushave të sportit të cilat po iu mungojnë shumë shkollave tona”, ka theksuar Kurteshi.
Po ashtu, sipas tij, është shumë me rëndësi të investohet edhe në përgatitjen e vazhdueshme të kuadrit arsimor dhe përditësimin e teksteve shkollore.
Deputeti Haskuka foli për nevojën e hapjes së çerdheve publike në Kosovë. “Në shumicën e vendeve jashtë Prishtinës, prindërit nuk mund të gjejnë vende të lira për t’i dërguar fëmijët e tyre në çerdhe. Në Prizren edhe çerdhja e vetme publike është komercializuar”, u shpreh ai.
Sipas tij, problemet që fillojnë në çerdhe vazhdojnë në shkolla fillore dhe të mesme me cilësi të dobët të arsimit. Po ashtu, sipas Haskukës, është e nevojshme që arsimi të lidhet me ekonominë në mënyrë që të ndikojë edhe në uljen e papunësisë.
Të dy deputetët uruan fillimin e vitit të ri shkollor, të gjithë nxënësve, mësimdhënësve, me shpresë se do të jetë një vit i përpjekjeve dhe arritjeve të sukseseve më të mëdha, në fushën e arsimit./tesheshi.com/
