Kryetari i grupit parlamentar të Lëvizjes Vetëvendosje, Glauk Konjufca, ka thënë se kërkesa e koalicionit PDK–AAK-Nisma (PAN), për të shtyrë seancën për javën e ardhshme po bëhet për të fituar kohë.
“Ata synojnë t’i mbyllin pazaret e tyre qoftë me Teuta Rugovën ose deputetët tjerë që duan t’i blejnë.
Arsyeja e vërtetë pse PAN po i nevojitet kohë, është se nuk i kanë numrat dhe po shpikin mbledhje konsultative që nuk janë në kompetencë të kryesuesit.
Kompetencat e tij janë që ai të përkujdeset për efektivitetin dhe mbarëvajtjen e seancës”, ka deklaruar Konjufca.
Ai më tej tha se PAN nuk po merr pjesë në seancë sepse duan me çdo kusht ta zgjedhin Kadri Veselin kryeparlamentar, e që sipas tij, Kosova ka mbetur peng i emrit të Veselit.
“Interesi i Kosovës është që kjo seancë të mbyllet sa më shpejt, që koalicioni PAN të propozojë kryetarin e ardhshëm të Kuvendit e Kosovës. Mirëpo ata nuk po e bëjnë këtë gjë sepse nuk i kanë votat për Kadri Veselin. Prandaj krejt Kosova është peng i një emri.
Ndaj ne jemi kundër këtyre takimeve. Tani i kemi rezultatet dhe jemi vetëm para një faze, jemi para zgjedhjes së kryetarit të Kuvendit. Nëse PDK nuk heq dorë nga Kadri Veseli, atëherë unë i ftoj që ta qesin Kadri Veselin në votim. Nëse ata patjetër duan ta qesin në votim Kadri Veselin, unë i ftoj që nesër ta qesin në votim meqenëse qenka kaq i rëndësishëm”, tha Konjufca. /tesheshi.com/
