Lëvizja Vetëvendosje, nëpërmes një kumtese ka thënë se ka pasur shkelje gjatë arrestimit të Arbër Zaimit, shtetasit të Shqipërisë.
VV, thotë se siç mund të shihet, dokumentet nuk kanë as numër protokolli as sqarime se ku mbështetet urdhri për largimin e tij nga Kosova.
“Arbër Zaimit iu tha se kishte kaluar afatin për 5 ditë nga koha e lejuar e qëndrimit në Kosovë edhe pse Policia nuk ishte në gjendje ta dëshmonte këtë sepse nuk kishte të dhëna të sakta nga kufiri. Për orë të tëra policia u përpoq që të gjej, siç i quajnë ata ‘lëndë’, për vepra penale, por nuk gjetën asgjë”, pohon VV.
Kjo Lëvizje thotë më tej se dokumentet iu dhanë Arbër Zaimit vetëm pas shumë orësh telefonata të ndryshme në Ministrinë e Punëve të Brendshme dhe se nuk iu dha mundësia që të njoftonin dhe të kishin prezent Autoritetet e Republikës së Shqipërisë dhe as avokatin e tij.
“Ambasada e Republikës së Shqipërisë sërish nuk ishte e njoftuar as para, as pas arrestimit dhe as pas dhënies së vendimit. Vetëm pasi u njoftuan nga Lëvizja Vetëvendosje, autoritetet e Ambasadës patën mundësi që të kërkojnë të dhënat nga Policia e Kosovës”, potencohet më tej në komunikatë duke thënë se ky është rasti i dytë i paprecedent sa u takon marrëdhënieve Kosovë – Shqipëri dhe sa i takon represionit të pashembullt ndaj Opozitës në Kosovë.
Vetëvendosje shton se populli i Kosovës nuk e dëshiron këtë që po ndodhë dhe ky është ekskluzivisht rezultat i politikës anti-kombëtare dhe jo-demokratike të qeverisë LDK-PDK-Srpska dhe se kërkon që urgjentisht të ndalen përndjekjet e tilla që për më tepër po bëhen pa asnjë bazë ligjore dhe në shkelje të të drejtave elementare të lirive dhe të drejtave të njeriut. /tesheshi.com/
