Sulmin e datës 4 gusht mbi selinë e Kuvendit të Kosovës, e kanë kryer aktivistë të Vetëvendosjes. Të paktën kështu konkludohet nga autoritetet hetimore dhe policore të Kosovës, që sot ndërmorrën një aksion duke vënë në pranga 6 syresh, të cilët janë: Atdhe Arifi, Astrit Dehari, Adea Batusha, Egzon Haliti, Petrit Ademi dhe Frashër Krasniqi, ky i fundit zëdhënës i Vetëvendosje-s, të konfirmuar edhe nga avokati Tom Gashi.
Pas këtyre arrestimeve, policia e Kosovës tha në një komunikatë se “ky hetim kompleks është trajtuar me teknika dhe masa të specializuara të hetimit dhe sot me urdhëresë të Gjykatës Themelore në Prishtinë është kryer kontrolli i gjashët lokacioneve në Prishtinë, ku janë arrestuar gjashtë të pandehur dhe janë shoqëruar dy persona tjerë”.
Më tej, komunikata sqaron se “gjatë zbatimit të urdhër-kontrollit, në cilësinë e provave materiale, janë sekuestruar: gjashtë armë zjarri, tre pushkë automatike, 2 revole, një karabinë, municion, si dhe dëshmi tjera materiale që ndërlidhen me rastin. Sendet e sekuestruara do të ekzaminohen nga ekspertët e fushave përkatëse”.
Por ky është një zhvillim i pazakontë në skenën politike kosovare, e që ndodh pak para seancës së pritshme në Kuvend për ratifikimin e Demarkacionit me Malin e Zi, për të cilin janë paralajmëruar dhe protesta të ashpra.
Së këndejmi, Vetëvendosje-s i vihet dhe akuza e një organizate politike militare, ndërkohë që pritet që dhe sulmet e tjera me bomba të ndodhura pas rastit të 4 gushtit, t’i faturohen asaj.
Pra, sipas asaj çfarë pohohet sot nga policia e Kosovës dhe Prokuroria e saj, “Rugovasit”, ata të cilët kanë marrë përsipër sulmet, na qënkan djemë të Vetëvendosjes, deri dhe eksponentë të lartë të saj, referuar emrit të Frashër Krasniqit mes të arrestuarve. /tesheshi.com/
