Lëvizja Vetëvendosje në reagimin e saj, pas bllokimit në qeverinë e Kosovës të projektligjit për arsimin e lartë nga ministrat e listës Serbe, thotë se universitetet nuk mund të ndahen etnikisht.
“Kolegjet dhe universitetet janë për qytetarët e Kosovës. Ato nuk mund të ndahen dhe kategorizohen brenda ligjeve tona sipas etnisë, sidomos universitetet karakteri i të cilëve është universal dhe lidhet me dijen e dobinë shoqërore”, thotë Vetëvendosje.
Bllokimi i miratimit të këtij projektligji në qeverinë e Kosovës nga lista Serbe me kërkesën për futjen në ligj si kategori e veçantë e universitetit të Mitrovicës së Veriut dhe financimin e tij nga Serbia, sipas Vetëvendosjes, është kërkesë për ta etnizuar sistemin universitar në Kosovë.
“Universiteti në fjalë është i rregulluar me normativat e pushtetit komunal meqenëse paraprakisht Kosova ka bërë lëshime që këto komuna më shumicë të popullsisë serbe të kenë hapësira për shkollim universitar specifik”, thekson Vetëvendosje.
Po ashtu, Vetëvendosje thotë se lista Serbe kërkon që ta mbajnë të izoluar këtë universitet nga pjesa tjetër e Kosovës dhe ta kategorizojë brenda ligjit si universitet të një etnie.
“Ky bllokim shkon në një linjë me bllokimin e njëjtë për ndërmarrjet publike, forcat e Armatosura të Kosovës e marrëveshjen për Zajednicën, pra të ndarjes etnike të Kosovës në çdo zonë të rregullimit shtetëror e shoqëror”, deklaron Vetëvendosje.
Lëvizja u bën thirrje profesorëve e studentëve të ngrenë zërin për mos ta lejuar këtë kërkesë që shkon në kundërshtim me çdo parim të funksionimit të universiteteve, shoqërisë dhe shtetit.
/tesheshi.com/
