Lëvizja Vetëvendosje, e cila të dielën e ka testin jetik të kalimit në qeveri apo të mbeturit si opozitë, sot ka befasuar me qasjen e të bërit fushatë.
Disa kandidatë të VV-së për deputetë, së bashku me kryetarin e komunës së Prizrenit që vjen nga kjo parti, Mytaher Haskuka, kanë dalë në kufi për të pritur mërgimtarët që kanë ardhur në Kosovë për të votuar për zgjedhjet e së dielës.
Ata kanë bërë të ditur aksionin e tyre përmes rrjeteve sociale ku janë publikuar edhe foto.
Pa i ikur traditës, VV-ja nuk përdori simbole shtetërore, por flamur kombëtar. Kjo nuk duket t’u ketë prishur qejfin mërgimtarëve, shumë prej të cilëve kur kanë lënë Kosovën, kishin të njëjtin flamur, si atë të shpalosur nga VV-ja.
Udhëtimi i tyre me veturë prej më shumë se 50 orësh nga qytete të ndryshme duket të ketë qenë i lodhshëm, por për kryetarin e Prizrenit, Haskuka, ata nuk ishin të lodhur, madje treguan se do të marrin pjesë në tubimin e sotëm të madh në Prishtinë.
Sot është dita e fundit e fushatës, ndërsa e nesërmja do të jetë heshtje, qetësi para ditës së zgjedhjeve që po konsiderohet si vendimtare për të ardhmen e vendit. /tesheshi.com/
/tesheshi.com/
