Shefi i grupit parlamentar të Vetëvendosjes, Glauk Konjufca, konsideron se qeveria duhet ta udhëheqë dialogun me Serbinë e jo presidenti Thaçi.
“Kuvendi duhet të jetë epiqendra, ku raportohet. Kryeministri nuk po e respekton rezolutën e kuvendit. Shkon e shkruan një rezolutë ku i thotë Thaçit po ta dorëzoj platformën për dialogun”, ka deklaruar Konjufca, në një tryezë të organizuar nga Grupi për Studime Juridike dhe Politike, ku u diskutua për një konsensus të mundshëm të dialogut.
Ai ka thënë se edhe VV është që të arrihet një konsensus, porse atëherë kur trajtohet edhe përmbajtja e konsensusit.
“Unë nuk konsideroj që konsensusi është gjëja më e rëndësisme. Konsensusi merr kuptim dhe ka vlerë vetëm kur është për gjëra nacionale. Sa herë që flasim për konsensus duhet ta trajtojmë përmbajtjen e konsensusit. Konsensus për çka? Ne duhet të kemi konsensus për ta mbrojtur interesin shtetëror”, ka thënë ai.
Konjufca më tej, ka thënë se presidenti Thaçi po do që të merret vesh me homologun Vuçiç që t’i akomodojë interesat e Serbisë.
“Po më duket që presidenti po do të hyjë në këtë fazën që po frikësohem, po do që me Vuçiçin t’i akomodojnë ambiciet shtetërore të Serbisë, që është krijimi i Zajednicës dhe që Kosova-Serbisë t’ia ofrojë një autonomi brenda Kosovës me kufij të qartë. Kështu që mendoj që ne nuk duhet ta pranojmë që ta ndajmë shpalljen nga njohja. Ne duhet të themi kështu: që nëse Serbia do të hyjë në BE, duhet t’i japë diçka Kosovës. Deri tash asgjë nuk i ka dhënë”, ka deklaruar zyrtari i lartë i Vetëvendosjes. /tesheshi.com/
