Vetëvendosje ka kërkuar lirimin nga paraburgimi të treshes Albin Kurti e dy gra, Albuena Haxhiu dhe Donika Kadaj-Bujupi, jo veç me argumenta politikë por dhe juridikë. Madje sipas Sami Kurteshit, eksponent i VV-së dhe jurist në profesion, gjyqtari Beqir Kalludra, pra ai që ka lëshuar urdhërarrestin për deputetët, ka bërë vepër penale.
Si argument, Kurteshi dha faktin se më 22 nëntor, VV ka bërë kërkesë për përjashtimin e trupit gjykues, e për këtë arsye, gjyqtari Kalludra nuk duhej të jepte asnjë vendim pa ardhur përgjigjia nga kryetarja e Gjykatës Themelore.
“Veprimi i tillë i gjyqtarit Kalludra përbën një vepër penale, e cila duhet të ndiqet, përgjegjësi penale, në lidhje me lëshimin e fletarrestit me gjithë kërkesën me shkrim të VV-s për përjashtim të trupit gjykues. Rrjedhimisht duke pasur parasysh se kemi të bëjmë me shkelje ligjore dhe vepër penale, ne konsiderojmë se vendimi për arrestimin është në kundërshtim me ligjin dhe prandaj kërkojmë lirimin e menjëhershëm të deputetëve nga paraburgimi dhe kërkojmë që të ndërmerren masa penale ndaj gjyqtarit Beqir Kalludra”, tha Kurteshi. /tesheshi.com/
