Kryetari i Kuvendit të Kosovës, Kadri Veseli, ka shprehur bindjen se qeveria “Haradinaj” do përfundojë mandatin 4- vjeçar, por një gjë të tillë nuk e beson aspak Vetëvendosja.
Nënkryetari dhe deputeti i kësaj partie, Dardan Sejdiu, mendon se qeveria Haradinaj, nuk do të jetë jetëgjatë, sepse nuk do varet vetëm nga ai.
Sipas tij, qeveria e re ka program “të vobektë” me pesë kryeministra dhe me ministra që nuk kanë asnjë ditë pune për të udhëhequr dikasteret e tyre.
“Në mandatin e kaluar kemi pasur tre kryeministra, Veselin, Mustafën, Thaçin, e kohë pas kohe edhe Vuçiçin. E sot i kemi pesë kryeministra: Haradinajn, Veselin, Pacollin, Limajn dhe Vuçiçin”, ka thënë Sejdiu në një intervistë për Telegrafin.
Ai po ashtu foli edhe për tri problemet kryesore të mandatit të kaluar që edhe sot mbeten temë e diskutimit siç janë: Kosova e Re, Demarkacioni dhe Asociacioni.
“Qeveria me 87 deputetë nuk ishte në gjendje të ecte përpara dhe sot për ne ky Demarkacion ka vdekur dhe duhet të ribëhet. Ramush Haradinaj e ka nisur këtë kauzë dhe është angazhim i tij. Sa i përket Asociacionit, edhe ai ka vdekur, pasi asnjë kapitull nuk përkon me Gjykatën Kushtetuese”, ka thënë ai. /tesheshi.com/
