Vetëvendosje e futi sot të ndjerin Astrit Dehari edhe në Kuvend, ku siç po dallohet, po e shndërron vdekjen e tij në paraburgim në një kauzë të re politike. Ajo kërkoi një seancë të jashtëzakonshme për ish-aktivistin e saj, por që nuk u miratua.
Për mbajtjen kësaj seance kanë votuar 26 deputetë, të cilët nuk përbënin shumicën, ndërsa është kundërshtuar nga partitë në pushtet PDK dhe LDK.
Kjo ka çuar në përplasje mes drejtuesve të VV-së dhe kreut të Kuvendit, Kadri Veseli.
Visar Ymeri e akuzoi Veselin për moslejim të dhënies së nënshkrimeve nga deputetë. Sipas tij, ka qenë Veseli ai që e ka penguar këtë duke iu thyer mendjen deputetëve të caktuar për të tërhequr nënshkrimet.
Por kryekuvendari tha do t’i japë nënshkrimet në muajin dhjetor për seancë të jashtëzakonshme për Deharin, duke theksuar se për vdekjen e tij do të çelen të gjitha letrat .
“Është e vërtetë se një djalë i ri ka vdekur në Kosovë dhe duhet të flitet në momentin e caktuar. Në momentin e caktuar PDK i jep nënshkrimet. Dhe ky moment është në muajin dhjetor. Duhet të flitet për ata qe e kanë nxitë qe ai të ia merr vetën jetës. Ky është sistemi ynë i brishtë i drejtësisë. Duhet me marr përgjegjësi kush e ka nxitë dhe kush e ka shkaktu vrasjen apo vetëvrasjen”, ka thënë Veseli.
Seanca e kuvendit edhe sot filloi me një aksion simbolik të Lëvizjes Vetëvendosje të cilët para foltores së kuvendit shpalosën pankartën “Drejtësi për Astritin”.
Madje deputetët e VV-së në palltot e tyre kanë vendosur shenjat me fotografinë e të ndjerit. /tesheshi.com/
