Disa aktivistët të Lëvizjes Vetëvendosje zhvilluan një protestë simbolike para godinës qeveritare në Prishtinë, duke i treguar opinionit, sipas tyre, dosjet kriminale të isa Mustafës. Protesta u ndërrmor si reagim ndaj mbajtjes në burg të disa aktivistëve të opozitës, pas aksioneve kundërshtuese ndaj Zajednicës.
Nol Nushi, aktivist i Vetëvendosjes, tha se Isa Mustafa po e vërteton se është kryeministër i ‘Zajednicës’. Më tej ai ka shtuar se kryeministri Mustafa ka vënë në përdorim çdo mjet që të mbrojë këtë marrëveshje të dëmshme. “Përmes policisë dhe drejtësisë së kapur ai i është lëshuar në gjah aktivistëve të opozitës”, theksoi Nushi, duke vijuar:
“Këtë zell të policisë dhe gjyqësisë sigurisht që nuk e shohim ndaj strukturave paralele, korrupsionit tenderomanisë, tjetërsimit të pronave, mafias së ndërtimit, klanit Hamiti dhe SHIK-ut dhe shumë strukturave të tjera kriminale që janë të lidhura ngushtë me pushtetin”, ka theksuar aktivisti Nol Nushi. Ai më tej u shpreh se “deri tash nga qeverisja Mustafa, kanë përfituar vetëm familja e tij, Serbia dhe Mali i Zi. Djemve po u jep tenderë, Serbisë po ia jep ‘Zajednicën’ e Malit të Zi po i fal territor.”
Po ashtu, ai në emër të opozitës së bashkuar ka bërë thirrje që të gjithë aktivistët të lirohen sa më parë, dhe të tërhiqen marrëveshjet e dëmshme, përndryshe këtë pushtet e pret rezistencë e fuqishme qytetare. /tesheshi.com/
