Ndonëse partitë rrallë herë ngritin zërin për mërgimtarët, një gjë të tillë së fundmi e ka bërë Lëvizja Vetëvendosje e cila ka shprehur shqetësimin e tyre për siç thotë padrejtësitë e mëdha që u bëhen bashkëatdhetarëve kur ata vijnë në vendlindje.
Në një konferencë për media, deputetja e VV-së, Donika Kadaj tha se mijëra qytetarë të Kosovës dhe diasporës paguajnë padrejtësisht mijëra euro për udhëtime për të ardhur në vendlindje dhe anasjelltas, madje ato dhjetëfishohen në periudha të pushimeve vjetore.
Ajo theksoi se marrëveshja e fshehtë e krijuar nga kompanitë e shitjes së biletave, ka bërë që të dëmtohen bashkatdhetarët tanë dhe si pasojë e kësaj, aeroporti i Shkupit po zëvendësohet për ditë e me shumë me atë të Prishtinës, pasi atje biletat janë shumëfish më të lira.
“Sot, në vend se t’i krijohen lehtësira për udhëtim, investim, pjesëmarrje në institucione, në fakt ky pushtet i rrjep fillimisht [bashkatdhetarët] me çmime astronomike të biletave e ata që vinë me automjete dihet si kalojnë në mungese të kartonit të gjelbër. Marrëveshje të fshehta që janë krijuar nga kompani të biletave të udhëtimit me shtetet ku kryesisht i kemi bashkatdhetarët tanë, e dëmtojnë rëndë buxhetin e tyre. Këso marrëveshjesh ndërmjet operatorëve ekonomikë kanë bërë që kompanitë e tilla të përfitojnë në kundërshtim me ligjin dhe bashkë me to edhe oligarkët politikë që i mbrojnë tani e pothuajse dy dekada”, tha Kadaj.
Deputetja e VV-së akuzoi Autoritetin e Konkurrencës për mos parandalimin e monopolit, porse sipas saj, kjo nuk mund të bëhet me njerëz që janë politik. Sipas saj, ky autoritet një kohë të gjatë ishte jo funksional si shkak i PDK-së dhe LDK-së të cilët nuk arrinin t’i dërgonin njerëzit e vet aty, por edhe pas funksionalizimit, me kompletimin e bordit, ky i fundit i ka ngufatur inspektorët hetimorë për të hetuar monopolet e shumta në shtetin e Kosovës.
Për shqetësimet rreth emërimeve politike ne këtë institucion, Kadaj tha se është njoftuar edhe kryeparlamentari Veseli, me 27 prill 2016 përmes një shkrese për shkeljet e bëra gjatë emërimit të anëtareve të komisionit, por sipas saj Veseli nuk ka vepruar, pasi “është vet pjesë e skemës kriminale të ngritur dhe ndërtuar ndërmjet partnerëve të koalicionit PDK-LDK”. /tesheshi.com/
