Lëvizja Vetëvendosje thotë se sot janë bërë 4 muaj nga dita kur në Prokurorinë Themelore në Prishtinë, dorëzuan mbi 80 kallëzime penale për siç thekson dhunën dhe shkeljeve të policisë gjatë intervenimit brutal në selinë e tyre, por Prokuroria e shtetit vazhdon të hesht.
Ky sulm i dhunshëm i njësive të specializuara të policisë së Kosovës, siç thotë VV ishte bërë pa ndonjë vendim të gjykatës, dhe ka qenë i motivuar politikisht drejtpërdrejt nga kreu i Qeverisë së Kosovës, dhe i zbatuar nga persona të kriminalizuar që janë në udhëheqje të policisë së Kosovës.
VV thotë se personat kryesorë përgjegjës për këtë janë drejtori i Përgjithshëm, Shpend Maxhuni, drejtori i Operacioneve, Raif Çala, si dhe persona të tjerë përgjegjës të njësive policore të specializuara.
“Ky intervenim i dhunshëm dhe grotesk, është përcjellë me një dhunë të jashtëzakonshme, të panjohur dhe të paparë deri atëherë për nga përmasat e përdorimit të arsenalit të armëve, njësive të policisë, të numrit të forcave policore dhe të brutalitetit policor. I gjithë intervenimi është përcjellë me shkelje të rënda të të drejtave të njeriut si: rrahje brutale dhe arrestime të të gjithëve brenda ndërtesës, pa dallim; fyerje në baza politike, personale dhe gjinore; kërcënime me jetë; plagosje me armë dhe lëndime të rënda trupore; demolime; vjedhje të serverit me incizime nga kamerat e brendshme të sigurisë; konfiskim të paligjshëm të materialeve nga zyrat, pa dëshmitarë”, u shpreh Sami Kurteshi, në konferencë për media.
Ai tha se për të gjitha këto veprime të kundërligjshme shumica e personave të dëmtuar nga kjo dhunë policore, kanë deponuar kallëzimet e tyre penale kundër policisë së Kosovës në Prokurorinë Themelore të Prishtinës. Deri më sot, përveç ftesës nga Inspektorati Policor i Kosovës, ku nuk është ndërmarrë asnjë veprim nga kjo prokurori.
Vetëvendosje thotë se “nuk e pranon lojën gjoja institucionale të zvarritjes së qëllimshme për trajtimin e këtij rasti nga Prokuroria dhe Gjykata, në emër të procedurave dhe afateve të parapara ligjore, me synimin e fundit që të arrihet te parashkrimi i rasteve dhe harresa institucionale dhe shoqërore e veprimeve të dhunshme të pushtetit”.
VV thekson se do të kërkojë vazhdimisht dhe do të mbajë përgjegjës të gjithë personat e përfshirë në këtë aksion çnjerëzor e fashist.
“Ndjekja ligjore nuk do të pushojë pa marrë parasysh makinacionet “politike”, “ligjore” dhe “policore” për harresë”, thuhet në komunikatën e VV-së. /tesheshi.com/
