Lëvizja Vetëvendosje përmes një konference e ka quajtur të papranueshëm vendimin e Panelit Zgjedhor për Ankesa dhe Parashtresa për rinumërimin e të gjitha votave në Prishtinë dhe Prizren, duke kërkuar edhe nga ndërkombëtarët të reagojnë.
Kandidati i VV-së për kryetar të Prishtinës, Shpend Ahmeti ka deklaruar se është çuditshme që vetëm në dy komunat ku ka fituar LVV urdhërohet rinumërim i tërësishëm i votave kurse në Dragash ku diferenca është shumë e vogël urdhërohet rinumërim i pjesshëm i votave.
“Nuk mund të kuptojmë se si mund të urdhërohet rinumërimi pa përfunduar numërimi i votave. QNR nuk e ka përfunduar numërimin e votave, e pastaj ka qenë dashur që të vie ndonjë ankesë nga partitë e pastaj të vendoset për rinumërim apo jo. Ne kërkojmë nga KQZ që menjëherë të vazhdojë numërimin e votave me kusht dhe me postë edhe për Prishtinën dhe Prizrenin. Çdo vendim tjetër është i papranueshëm për ne”, ka thënë Ahmeti.
Edhe kandidati i VV-së për kryetar të Prizrenit, Mytaher Haskuka e ka quajtur të papranueshëm këtë vendim.
Haskuka ka treguar se gjatë ditës së zgjedhje nuk është raportuar për ndonjë parregullsi në Komunën e Prizrenit, duke shtuar se PDK është ankuar në KQZ pasi ka parë se i ka humbur zgjedhjet në Prizren.
Edhe kryetari i LVV-së, Visar Ymeri e ka quajtur të jashtëligjshëm dhe të kontestueshëm vendimin e PZAP-it
“Ne nuk do të rrimë duarkryq dhe nuk do të lejojmë që demokracia dhe vullneti i shprehur i qytetarëve te përdhoset nga kriminelët”, ka thënë Ymeri.
Ai u ka bërë thirrje ndërkombëtarëve dhe ambasadave që të reagojnë siç tha “kundër këtij dhunimi të demokracisë”. /tesheshi.com/
