Deputeti i Lëvizjes Vetëvendosje, Frashër Krasniqi, ka reaguar pas akuzave që bëri sot Kadri Veseli ndaj tij për terrorizëm apo sulm ndaj Kuvendit të Kosovës, duke thënë se kreu i PDK-së dhe kjo parti kanë terrorizuar vendin duke e vjedhur e keqpërdorur.
“Na akuzoi për terrorizëm, ndërkohë që e terrorizuan këtë vend duke e vjedhur e keqpërdorur. Na akuzoi se do ta kthejmë Serbinë, ndërkohë që i ka rënë në gjunjë Listës Srpska. Kadri Veseli me të drejtë ishte i shqetësuar sot. Ai e di ku do të përfundojë pas humbjes së pushtetit”, ka shkruar Krasniqi në Facebook.
Kujtojmë se gjykata ka hequr masën e paraburgimit dhe arrestit shtëpiak për katër aktivistët e Vetëvendosjes që dyshohen për sulm ndaj Kuvendit, në mesin e të cilëve është edhe Krasniqi.
Seanca gjyqësore ndaj tyre do të vazhdojë më 25 gusht. /tesheshi.com/
