Kryesuesi i seancës konstituive të Kuvendit të Kosovës, Adem Mikullovci, ka bërë të ditur se nuk do të thërrasë më seanca pa u marrë vesh mes drejtuesit e partive politike.
Sipas tij, pas seancës të së enjtes, të cilën e kishte caktuar me kërkesë të koalicionit PAN dhe të cilët dje nuk ishin në gjendje ta propozojnë kandidatin për kryeparlamentar, qytetarët po e shohin qartë se kush po e bllokon shtetin.
“Qytetarët e Kosovës në këtë seancë e panë se kush janë ata që po e bllokojnë shtetin. Ata njerëz nuk janë të gatshëm ta dorëzojnë shtetin, të cilin e kanë uzurpuar prej 18 vjetësh. Ata nuk kanë forcë ta bëjnë një gjë të tillë, por nuk i kanë as numrat në Kuvend”, ka deklaruar Mikullovci për gazetën “Zëri”.
“Unë do të pres se si do të merren vesh partitë mes tyre. i thashë Albinit dhe koalicionit LAA merruni ju vesh, bëni çfarë të doni. Atë moment që të më njoftoni, unë e thërras seancën e radhës. Nuk e thërras Kuvendin vetëm kur të më thotë ‘Vetëvendosja’, por kur të thotë edhe LDK-ja”, ka shtuar Mikullovci.
Në seancën e djeshme kandidati i koalicionit PAN për kryeparlamentar, Kadri Veseli, ka deklaruar se në momentin që Vetëvendosja i siguron 61 vota të deputetëve, mund të i formojë institucionet.
I pyetur për një deklaratë të tillë të Veselit, Mikullovci shpreson që të paktën një herë drejtuesi i PDK-së ta mbajë fjalën.
“Kadri Veseli tha se në momentin që i bëni 61 vota, ia pafshi hairin Qeverisë. Unë pres që ata të paktën një herë ta mbajnë fjalën”, ka thënë Mikullovci.
Ai beson se VV do të mundë të sigurojë të paktën 61 vota të deputetëve dhe sipas tij, të propozojë kandidatin për kryeparlamentar dhe për kryeministër. /tesheshi.com/
