Vetëm brenda dy muajve, qytetarët kanë marrë 1 mijë e 889 ekstrakte të lindjes, numër ky shumë më i lartë se të gjitha pritshmëritë e autoriteteve komunale të Prishtinës, me anë të shërbimit të nisur prej qershorit.
Vetëshërbimi dixhital për çertifikatat, ekstraktet apo shërbimet e gjendjes civile është në dispozicion 24 orë, 7 ditë në javë dhe qytetarët të cilët janë të regjistruar në regjistrin civil, si dhe kanë nxjerrë edhe më parë një ekstrakt, në çfarëdo kohe përmes një procesi tejet të thjeshtë, me letërnjoftimin e tyre mund ta shtypin ekstraktin e në të ardhmen edhe çertifikata të tjera.
Vetëshërbimi dixhital do të mundësojë tre komponentë të cilët janë E-Kiosk, aparati i cili mundëson nxjerrjen e ekstraktit të lindjes për përdorim interno, e cila tashmë është në shërbim të qytetarëve, por edhe mundësinë e shtypjes së formularëve nga cilado drejtori e Komunës së Prishtinës si dhe dërgimin e formularëve të plotësuar drejtpërsëdrejti në mënyrë automatike në Qendrën për Shërbime me Qytetarë, shërbime këto që pritet të fillojnë brenda një periudhe të shkurtër kohore.
Nga viti i ardhshëm këto pika të vetëshërbimeve dixhitale planifikohen të vendosen në bashkësitë lokale, si dhe nëpër pika kyçe të qytetit të cilat janë më të frekuentuara nga qytetarët.
“Vetëshërbimi dixhital”, është një pajisje e vendosur në komunën e vjetër të Prishtinës, përmes së cilit qytetarët mund ta nxjerrin vetë çertifikatën e lindjes. Qytetarët mund t’i kryejnë vetë veprimet, pa praninë e punonjësve të komunës. /tesheshi.com/
