Nga Mensur Krasniqi
Ç’prej kohës së komunizmit, 5 Maji në Shqipëri përkujtohet si Dita e Dëshmorëve. Sebep ka qenë vrasja në këtë ditë, në vitin 1942, e Qemal Stafës, një prej figurave të Partisë Komuniste. Megjithatë, ajo i ka rezistuar kohës pa u kushtëzuar nga nga rrethana ideologjike.
Madje as të djathtët në Shqipëri nuk e kanë kontestuar ndonjëherë, së paku këtë ditë, duke e “lënë rehat” atë pjesë të popullsisë që pikërisht më 5 maj, për shumë arsye, ka dëshirë të përkujtojë të rënët. Për më tepër, kjo ditë ka kaluar dhe kufijtë e Shqipërisë dhe është bërë simbol dhe për atë pjesë jashtë saj, gjithsesi shqiptare, që po ashtu ka luftuar e sakrifikuar. Kështu e sheh dhe Besim Hoda, kryetar i Veteranëve të Luftës së UÇK-së në Maqedoni.
“5 maji është dita që çdo shqiptar i mirë përkujton sesa i shtrejtë është atdheu. Kjo ditë është dhe do të mbetet edhe në vazhdim si dita që do ju dëshmojë brezave të ardhshëm se cila ka qenë sakrifica e mbijetesës së qenies sonë, dhe njëkohësisht cila do të jetë rruga që duhet ndjekur për të realizuar amanetin e madh të brezave ndër shekuj”, thotë Hoda.
Nga ana tjetër, atë e shqetëson fakti i abuzivitetit politik me UÇK-në, ku veçon pra BDI-në. Është një fakt i mirëqenë që kjo parti e ka bazën tek ish-Ushtria Çlirimtare Kombëtare, nja formacion që iu kundërpërgjigj me forcën e armëve pushtetit maqedonas në vitin 2001, në kërkim të të drejtave të mohuara të shqiptarëve.
Por për Hodën, e gjithë ajo çfarë ndodhi më pas në rrafshin politik ka brenda abuzivitetin, pikërisht nga ana e BDI-së.
Që në themelimin e saj BDI bëri gabimin e madh që i lejoi vetes të shfaqet si trashëgimtare direkte e luftës së lavdishme të UÇK-së, sepse nuk mundet që gjithë ai kapital gjithëkombëtar të tkurret në kuadër të një subjekti politik e të merret e drejta të thirret në emër të UÇK-së, pavarësisht kontributit individual të Ali Ahmetit dhe disa individëve që u radhitën në këtë subjekt. Kur kësaj do i shtohet dhe fiaskoja në interpretimin dhe në mbrojtjen e këtij kapitali që kryekëput i atribuohej vetëm kombit, ngritjes dhe mbrojtjes së vlerave të tij, me theks të veçantë zgjedhjes së statusit politiko -juridik të shqiptarëve në Maqedoni, pasi që BDI ka dështuar në këtë drejtim. Pra nga kjo del që kjo parti ka dështuar në prezantimin politik të vlerave të luftës, duke e devijuar këtë kapital gjithkombëtarë në interesa të ngushta individuale e grupore të disa individëve të cilët duke u fshehur pas petkut patriotik të rrejshëm e duke u radhitur pas shkronjave të UÇK-së, me ose pa dashje kanë përdhosur idealin e luftës dhe gjakun e dëshmorëve dhe fatkeqësisht kjo po ndodh edhe tani, me mospërfshirjen në platformën politike të statusit të dëshmorëve, invalidëve dhe rehabilitimin e ish-ushtarëve. Nëse do të ndodhte e kundërta, do kthehej baraspesha politike e qëllimit të luftës, do shfaqeshin themelet e vërteta të kësaj lufte duke u implementuar në kuadër të kushtetutës, gjë që do dëshmonte barazi në bazë të asaj që edhe u ndërpre lufta, pra Marrëveshjes së Ohrit. Pra forma e tanishme ku të ashtuquajturit branitela shpërblehen, ndërsa pjestarët e UÇK-së ndiqen, vriten burgosen, maltretohen, ka kthyer fitoren në terren të luftës së shqiptarëve në 2001 në një humbje politike e dëshpëruese në tavolinë”, pohon me dëshpërim Hoda.
Për të si kreu i Veteranëve, misioni i UÇK-së ende nuk është kryer, ende nuk ka marrë formë dhe nuk prekur në terren, mu për shkak të abuzivitetit politik. Dhe Hoda gjen rast që 5 Majin e dëshmorëve, pavarësisht se me burim komunist, ta shfrytëzojë për të çuar një mesazh në emër të atyre që luftuan për për kuaza etnike dekada më vonë.
“Mesazhi ynë mbetet konsekuent në vijë të asaj që vetëm zgjedhja e statusit politiko-juridik të shqiptarëve në Maqedoni do të ishte respekti i vetëm ndaj dëshmorëve dhe idealeve të luftës së UÇK-së të vitit 2001”, thotë Hoda.
Dhe nuk janë të pakët të tjerë si ai që mendojnë se kuaza e UÇK-së u tret nga përfitimet politike, edhe të një pjese që ishin nën armë, por që nuk e ruajtën dhe mbajtën dot idealin e luftës duke iu dorëzuar tundimit të embël të pushtetit. Dhe në gjykimin e tyre, Ali Ahmedi është një ndër ta, më kryesori dhe më dëmsjellësi në këtë drejtim. /tesheshi.com/
