Një ditë para protestës së 9 majit e organizuar nga Këshilli Opozitar Shqiptar në Maqedoni në kuadër të Ditës së Europës dhe përvjetorit të konfliktit në Lagjen e Trimave në Kumanovë, atë e ka mbështetur edhe Organizata e Veteranëve të Luftës së Ushtrisë Çlirimtare Kombëtare.
Ata i thërrasin të gjithë shqiptarët, siç shprehen, “pa dallim ngjyrash partiake, që nesër më 9 maj, bashkërisht të protestojnë, për drejtësinë e mohuar, kundër të keqes, si një obligim hyjnor, për të mirën e përgjithshme, për të mirën e brezave të ardhshëm”.
“E keqja nuk ndalet duke heshtur, padrejtësia nuk ndalet vetëvetiu, prandaj duhet ngritur zëri, në mënyra të ndryshme, deri sa të arrihet qëllimi, të mundet e keqja dhe të sundojë drejtësia. Vetëm të bashkuar mund ta arrijmë qëllimin final, andaj të bëhemi një dhe t’i themi MJAFT MË PADREJTËSISË”, thuhet në komunikatën e kësaj organizate. /tesheshi.com/
