Kryeminsitri Rama i vuri një afat 100 ditor Policisë së Shtetit, për të qenë ajo që duhet të jetë, duke nisur, siç tha, me zhdukjen e të korruptuarve brenda saj.
“Keni 100 ditë për ta rivënë të gjithë trupën në angazhim maksimal nga i pari te i fundit. Asnjë ditë më shumë.
Qytetarët të marrin frymë të lehtësuar duke e parë policinë e shtetit në një nivel tjetër.
Kjo duhet bërë për respektin e vetes, respektin e masës dërrmuese të trupës që është korrekte dhe që nuk ka pse t’i paguajë kostot një pjesë që duhet zhdukur nga policia e shteti dhe të shkojë në drejtim të drejtësisë.
Pas 100 ditësh nuk mund të ketë komisarë që luajnë me dy porta. Ju nuk e keni problem që t’i kapni dhe t’i çoni para drejtësisë.
Nuk mund të ketë komisarë, shqiponja, çakenj që rrinë si të infiltruar në polici. 100 ditë”, tha Rama gjatë një takimi me krerë të Ministrisë së Brendshme në kuadër të ristrukturimit të Policisë.
Rama u ndal veçanërisht te rasti i një lufte në një lokal nate në Sarandë, ku një një përplasje të tipit edhe mafioz, mbeti i plagosur një turist si dhe pronari i lokalit.
“Kush janë këta pronarë lokalesh në zonën bregdetare që në mënyrë të hapur shkelin ligjin e tejkalojnë orën policore.
Krijojnë hapësirë abuzimi që degjeneron deri në krisma dhe plagosje në mes të një dynjaje të tërë. Këta janë tutorët e policisë në atë territor. Këta janë korruptuesit e policisë së shtetit. Janë abuzuesit më të mëdhenj me uniformën e policisë së shtetit që tërheqin prej hunde ponicë e shefa komisariatesh duket i kthyer në roje të aktivitetit të tyre të paligjshëm.
Rasti i Sarandës ishte alarmant. Ai rast duhet të çohet në ndëshkimin penal të gjithë zinxhirit të komandës në Sarandë”, tha Rama. /tesheshi.com/
