Uruguaianët në kryeqytetin Montevideo po luten për shi, ndërsa vendi është goditur nga një thatësirë me përmasa historike, e cila ka lënë rezervuarin kryesor të qytetit me ujë për vetëm dhjetë ditë.
Reshjet e ulëta dhe temperaturat e larta në rajonin jugor të Amerikës së Jugut kanë shkaktuar thatësirë të rëndë gjatë vitit të kaluar, duke goditur të korrat në Argjentinën fqinje prodhuese të drithit dhe duke shkaktuar humbje të mëdha në ferma.
Në Uruguaj, mungesa e ujit është më e keqja e parë në 74 vjet, sipas zyrtarëve. Krijon probleme në furnizimin me ujë të mijëra familjeve dhe ka degraduar cilësinë e ujit.
“Jam e shqetësuar për faktin se ne po mbështetemi te shiu si zgjidhja e vetme”, thotë Vanessa Fleitas jashtë shkollës së fëmijës së saj në Montevideo, e cila mbylli mësimet më herët për shkak të mungesës së ujit të pijshëm për nxënësit. “Është jashtëzakonisht nxehtë për këtë periudhë të vitit.”
Niveli në rezervuarin Paso Severino, i cili furnizon me ujë më shumë se gjysmën e 3.5 milionë banorëve të Uruguait, është në një “nivel historikisht të ulët”, sipas kompanisë shtetërore të ujit Obrax Sanitarias del Estado (OSE), pasi është plot vetëm në 10 % e kapacitetit të saj.
Shifrat e fundit tregojnë se ajo ka rreth 6.2 milionë metër kub ujë, shumë larg mesatares mujore prej 60 milionë. Për furnizimin me ujë të kryeqytetit nevojiten rreth 650 mijë metër kub në ditë.
Shiu i pakët që ra ditët e fundit “nuk e ndryshon situatën”, tha OSE, megjithëse parashikohen disa stuhi në fund të kësaj jave. Parashikuesit thonë se 50 mm shi nevojiten çdo ditë gjatë gjithë qershorit që nivelet e rezervuarëve të fillojnë të rikuperohen.
Zvogëlimi i furnizimeve me ujë të pijshëm në rezervuarin kryesor të vendit detyroi kompaninë publike të ujit në fund të prillit të përziente furnizimet me ujë nga grykëderdhja e Río de la Plata, duke rezultuar në nivele jashtëzakonisht të larta të natriumit dhe klorurit.
“Klientët e mi nuk i besojnë asaj që del nga rubineti,” thotë shitësi Ramon Arteaga në qendër të Montevideos, ku shitjet e ujit në shishe janë rritur dhjetëfish që nga fillimi i mungesës së ujit.
Zemërimi i banorëve për mungesën e ujit sa vjen e rritet dhe nesër, të mërkurën, janë planifikuar protesta në kryeqytet.
Federico Kreimerman, president i sindikatës së punëtorëve OSE, thotë se reshjet e pakta, keqmenaxhimi i rezervave dhe mungesa e investimeve të qeverisë janë përgjegjëse për mungesën e ujit. Uji i destinuar për konsum njerëzor gjithashtu keqpërdoret në kulturat e sojës, blegtorinë dhe pylltarinë, shton ai. /tesheshi.com/
