Sezoni që po ikën mund të quhet dhe i serbëve. Ishin ata ndër prurjet më të mëdha dhe befasuese të kësaj vere, duke zgjedhur pra, përkundër konteksteve nacionaliste tradicionale, bregdetin shqiptar, sidomos Sarandë – Ksamilin për të pushuar.
Shëtitorja e re e kësaj vere foli kryesisht serbisht.
Kjo bëri që pothuajse në shumicën e hoteleve, klientela të përmbante serbë e kosovarë si fqinj disaditorë me njëri-tjetrin. Sigurisht, asnjë incident. Veç motivit për të cilin erdhën – pushimet – asgjë tjetër.
Madje në një hotel në Kodër, një burrë serb e një kosovar u miqësuan, siç rrëfen pronari i atyshëm, dhe nisën të rrëkëllejnë ndonjë gotë bashkë. Me gjasë, kanë rastisur me identitet jugosllav që të dy. I përkitnin asaj kohe dhe ajo i ka miqësuar.
Ndërsa përshtypjen e përgjithshme të pronarëve që patën serbë në hotelet e tyre ishin ndër më të mirat. Asnjë befasi e pakëndshme me ta.
Pra duket sikur nuk e kishin marrë nacionalizmin me vete. Por jo!
Në një kompleks hotelier në qendër të Ksamilit nuk pati asnjë serb për bé. Shkak sipas menaxherëve të atyshëm kosovarë, flamuri kosovar në hyrje.
“Serbët janë më inatçorë nacionalistë se ne(kosovarët)”, thotë një gjilanas i atyshëm.
Megjithatë, ai shton se po të vinin, ose nëse vijnë, do kenë një trajtim pa asnjë diferencim në shërbim. Ky është një realitet turistik me terma tregu që s’lejon shumë sentimente nacionaliste. Atë që s’po e bëjnë dot politikat, qeveritë, po e bën tregu turistik. Por jo në çdo rast. Siç u provua, mes rrobave të banjës, serbët mbankan të fshehur dhe rrobën e leshtë nacionaliste. /tesheshi.com/
