Shqipëria do të provojë rezultat pozitiv si në ndeshjen me Spanjën, ashtu edhe në atë me Italinë. Me sa duket, kjo është bindja që ka përçuar tek lojtarët kuqezi, trajneri Kristian Panuçi. Pak a shumë, në këto terma janë shprehur, edhe të përzgjedhurit për folur për mediat, Frederik Veseli dhe Emanuele Ndoji.
“Ne do të provojmë, të fitojmë është e vështirë, por ne do të japim maksimumin. Nuk shkojmë me idenë se do të humbasim. Të dy ndeshjet janë të bukura, nuk ka ndryshim nëse është Spanja apo Italia, duhet të bëjmë më të mirën tonë. Nuk dua të mendoj për humbjen”, është shprehur Veseli.
Mbrojtësi i Empolit po shihet edhe si titullar i mundshëm nga Panuçi, për shkak të mungesave të Mavrajt dhe Kukelit, të pezulluar për shkak kartonësh.
Sipas tij, edhe në ndeshjen e parë kundër Spanjës në Loro Boriçi, të humbur 0-2, golat u pësuan për shkak të disa gabimeve të mbrojtjes. Mjaft i emocionuar është shfaqur edhe mesfushori 20 vjecar Ndoji, i cili është thirrur për herë të parë me Kombëtaren.
“Jam i gëzuar që më kanë grumbulluar, me lojtarët e tjerë ndihem mirë. Nuk pretendoj asgjë. Jam i ri dhe është hera e parë që grumbullohem me Kombëtaren. Këtu do të bëj gjithcka thotë trajneri. Është një mundësia e madhe për mua këtu, por edhe nëse luaj me Kombëtaren Shpresa, për mua nuk përbën asnjë problem. Nuk jam stërvitur mirë sepse jam dëmtuar ndaj Perugias, por shoh që në skuadër punohet me intensitet dhe ka shumë kualitet”, ka qenë “justifikimi” i sinqertë i 20 vjecarit, që është rritur në Akademinë e Romës. /tesheshi.com/
